Dongfeng Қытайға арнап Jeep жасайды

Марка Қытайдағы өндірушімен бірге үлкен жобаны қолға алды. Жергілікті басылымдар хабарлағандай, Stellantis концерні Dongfeng-пен бірлесіп Jeep-тің Қытайдағы топтамасына қосылатын жаңа кроссовер әзірлейміз деп келіскен. Модель бір жарым жылда жолға шығуы керек.

Кроссовердің сырт келбетіне Stellantis жауапты, ал Dongfeng платформа, күштік құрылым және жүргізуші ассистенттерінің кешені сияқты негізгі технологиялық жағымен айналысады. Мерзімі қысқа екенін ескерсек, компаниялар дайын әзірлемелерді қолдануы ықтимал.

Инсайдерлер жаңа өнім Voyah және M-Hero (Mengshi) көліктеріне орнатылатын гибрид немесе электрлі құрылымның бірін алады дейді. Бұл брендтер Jeep сияқты премиум сегментке кіреді. Инженерлер автомобильге M817-дің үш моторлы жүйесін орнатуы ықтимал, ол 687 ат күшін береді.

Stellantis өкілдерінің пікірінше жергілікті компанияның қатысуы жаңа модельді Қытайдағы клиенттердің талғамына сай етіп жасауға мүмкіндік береді. Машина Jeep-тің әлсіз позициясын нығайтуға көмектеседі. Аспан асты елінде Jeep өндірісі Stellantis пен GAC бірлескен кәсіпорны 2022 жылы банкрот болғаннан кейін тоқтаған.

Алдын ала мәлімет бойынша жаңа Jeep алдымен тек Қытайда сатылады, кейін экспортқа шығады. Көлікті дилерлер 2027 жылдың бірінші тоқсанында саудалай бастайды.