Chevrolet 1959 жылы El Camino моделін шығара бастаған. Мамандар сол жылы жасалған пикаптардың бірін люкс рестомодқа айналдырып, сатуға қойды. Ют жаңарған мотор, өзгерген аспа және жаңа интерьер бөлшектерімен ерекшеленеді.
Сатушылар пикапты заманауи құрылғымен жабдықтамас бұрын қайта жөндеуден өткізіпті. Шанақ қызыл аралас қара түске боялған, былғарымен қапталған салон түсі де қызыл.
Салонда заманауи жабдықтар бар. El Camino климат-бақылау жүйесі, жылытуға болатын орындық, электрлі әйнек көтергіш және рөлді гидрокүшейткішпен жабдықталған. Бірақ рестомод сипаттамасында медиажүйе жайлы ақпарат жоқ.
El Camino 5.7 литрлік V8 моторымен жүреді, ол автомат қораппен жұптасады. Бірінші буын пикапта осыған ұқсас мотор болған, бірақ мұндағы күштік құрылым басқаша. Бұл Chevrolet Performance каталогынан алынған 8 цилиндрлі ZZ4. Зауыттық ZZ4 355 ат күші мен 549 Нм береді, бірақ El Camino-да бұдан қуатты екені анық.
Қазір машина дискілі тежеуіш және алдында 18 дюймді, артында 20 дюймді дөңгелек дискісімен мақтанады. Фотосуреттен El Camino-да пневматикалық элементтер де бар екенін байқауға болады.
Былтыр қазанда тағы бір ерекше пикап — алты дөңгелекті Jaguar XJ саудаға шыққан. Бірақ ол небәрі 13.5 мың еуроға бағаланды.
Комментариев: 0