Chery Ресейден кетіп, Geely моделі «Волга» атана ма?

Жуырда Nikkei басылымы Chery концерні Гонконг қор биржасындағы IPO-ға дайындалып жатыр деп жазды. Автоөндіруші инвесторларға 2027 жылға қарай Ресейдегі тауар санын шектеуге уәде беріпті, мұндай қадамға баруына санкция құрсауына түсіп қалу қаупі ықпал еткені анық.

«Коммерсантъ» Chery-дің Ресейдегі кеңсесі мұны жоққа шығарғанын хабарлады. Шын мәнінде концерн Exeed, Omoda, Jaecoo, Jetour сияқты брендтерін Ресейден алып кетіп, бұл елдегі клиенттеріне мүлде басқа атаумен өнім ұсынуды жоспарлап отырған секілді.

Процесс әлден басталып кеткенін аңғару қиын емес, Калугадағы «Холдинг АГР» зауыты Tenet маркалы T4, T7 және T8 кроссоверлерін құрастырып жатыр, бұл үшеуі Tiggo 4, Tiggo 7 және Tiggo 8-дің баламасы саналады. Exeed модельдерін Мәскеу маңындағы кәсіпорын, Jaecoo көліктерін Шушарыдағы мекеме шығарады.

Chery Ресейден бүкіл өнімін алып кете алмайды, өйткені ол концерн үшін Қытайдан кейінгі екінші маңызды нарық, ал жекелеген маркалар сауда рейтингінде үздік ондықтан түскен емес.

Қытай маркаларының ребрендигін сөз еткенде «Волганың» жандануына қатысты жағдай қызық көрінеді. Бұл мәселе талай көтеріліп, орыстар Škoda, Hongqi не Changan-ды іске тартады деп болжанған. Енді жұрт жобаны Geely-дің ГАЗ кәсіпорны өндіретін Monjaro кроссоверімен, Emgrand, Preface седандарымен байланыстыра бастады.

Горький автозауыты идеядан бірден бас тартып, бар жауапкершілікті ГАЗ-дың өндіріс алаңдарын жалға алып отырған «Производство легковых автомобилей» (ПЛА) мекемесіне арта салды. ПЛА Geely-мен серіктес болуға дайындық жүріп жатқанын ресми түрде жоққа шығарғанмен, «Коммерсантъ» тілшілері де, «Русский автомобиль» де өз дереккөздеріне сүйеніп, екеуінің арасында байланыс бар деп жазды. Ал жаңарған «Волга» келер жылы көктемде конвейерге тұруға тиіс. Себебі қыркүйектің басында бірінші вице-премьер Денис Мантуров осылай деген.