2022 жылғы тамызда елде жаңа автокөлік былтырғы ұқсас мезгілмен салыстырғанда 25.4 %-ға көп сатылды. Дилерлер жаздың соңғы айында жүк көлігі мен автобусты қоса есептегенде 11 411 машина өткізген, оның 10 668-і жеңіл көлік пен жеңіл коммерциялық техника.
Қазақстан автобизнес ассоциациясы (ҚАБА) хабарлағандай, биыл сегіз айда 74 953 жаңа машина иесін тауып, былтырғы көрсеткішке (76 090) жақындады.
Тамызда тағы Chevrolet көліктерінің саудасы қызды (3854 дана). Екінші орынға Hyundai (2226) жайғасса, үздік үштікті Kia (1485) түйіндеді. Үздік ондыққа бірнеше қытайлық марка енгенін айта кеткен жөн. Бұған дейін де жақсы өтіп жүген JAC-тың қатарына енді Chery мен Exeed қосылды. Chery — 519, JAC — 292, ал Exeed 233 машина сатты.
2022 жылғы тамыз қорытындысы бойынша нарықтағы үздік 10 марка
| Орын | Марка | 2022 жылғы тамыздағы сатылым (дана) |
| 1 | Chevrolet | 3854 |
| 2 | Hyundai | 2226 |
| 3 | Kia | 1485 |
| 4 | Toyota | 998 |
| 5 | Lada | 592 |
| 6 | Chery | 519 |
| 7 | JAC | 292 |
| 8 | Exeed | 233 |
| 9 | Lexus | 231 |
| 10 | Renault | 59 |
Танымал модельдер тізімінде де өзгеріс бар. Chery Tiggo 8 Pro (275), Chevrolet Equinox (217) және Kia K5 (305) алғаш рет үздік ондыққа енді. Бірақ әлі Chevrolet Cobalt (2193) пен Chevrolet Nexia (1136) көш бастап тұр. Үшінші орынға Hyundai Tucson (804) ие болды. Өткен айда үздік үштікте Kia Sportage болған еді.
Комментариев: 0