Жаздың екінші айында дилерлер 10 971 жеңіл машина мен жеңіл коммерциялық техника сатты. Бұл былтыр шілдедегі (9860 дана) көрсеткіштен айтарлықтай жақсы. Бірақ жүк көлігі мен автобус (666 дана) былтырғыдан (808 дана) аз өтті.
Айта кетерлігі, елімізде жаңа көлік сатылымы екінші ай қатарынан 11 мыңнан асып отыр.
Шілдеде Chevrolet көліктері ең көп сатылды (4004 дана), бұл 2021 жылғы шілдемен салыстырғанда 29.4 %-ға көп. Марканың ең өтімді моделі — Cobalt (2796 дана). Бұл Hyundai дилерлері сатқан жалпы көлік санынан (2607) көп. Kia (1350), Toyota (903) және Lada (675) үшеуін қоса есептегеннің өзінде Cobalt-тан сәл ғана көп өткен. Шілдеде жақсы сатылған бес марка ішінде Toyota ғана былтырғыдан (1199) нашар нәтиже көрсетті.
2022 жылғы шілде қорытындысы бойынша нарықтағы үздік 5 марка
| Орын | Марка | 2022 жылғы шілдедегі сатылым (дана) |
| 1 | Chevrolet | 4004 |
| 2 | Hyundai | 2607 |
| 3 | Kia | 1350 |
| 4 | Toyota | 903 |
| 5 | Lada | 675 |
Алғашқы жеті ай қорытындысы бойынша Chevrolet (16 631 дана) көш бастады. 15 563 машина сатқан Hyundai екінші орынға ие болды. Ал үздік үштікке енген Kia (6906) бұлардан айтарлықтай аз көлік саудалады, бірақ бұл 2021 жылғы ұқсас кезеңмен салыстырғанда 30 %-ға артық.
Танымал модельдер тізімінде Chevrolet Cobalt үздік шыққанын жоғарыда айттық. Екінші сатыға тағы бір «шеви» моделі Nexia (957 дана) тұрақтады. Одан кейінгі орынға жаңа буындағы Kia Sportage (917) жайғасты. Бұлардан бөлек үздік бестікке Hyundai Tucson (810) мен Toyota LC Prado (491) енді.
Комментариев: 0