«Буханка» электрлі болады

Жақында Ульяновск автозауытының бас директоры классикалық УАЗ-452 («буханка») жалғасты шығатынын айтқан, енді оның электрлі нұсқасы жарық көретіні белгілі болды. Соңғысының өндірісіне УАЗ ғана емес, «Элькафа» ғылыми-зерттеу бірлестігі де жауапты. ТАСС агенттігі «Рустрансэлектро» төрағасы Михаил Демурия берген мәліметке сүйеніп, компания модельді электр тартымға ауыстыруға дайындалып жатқанын хабарлады.

Алғашқы прототип 2023 жылы көктемде немесе жазда жолға шығады. Спикер РФ индустрия және сауда министрлігі электромобиль сатып алуға субсидия беретінін ескере отырып, электрлі УАЗ-452-нің бағасы мөлшермен 2 млн рубль (12.7 млн теңге) болуы мүмкін деген болжам айтады.

Техникалық сипаттамасы жайлы айтсақ, машина 104 ат күші мен 320 Нм беретін мотормен жүреді. Өндіруші қазіргі беріліс қорабы мен үлестіруші қорабын өзгеріссіз қалдыруды жоспарлап отыр. Рөлді гидрокүшейткіш пен тежеу жүйесінің вакуумды сорғысы өзгеріске ұшырайды. «Буханканың» жүріс қоры 300 км болады. Компания опция ретінде аккумуляторды қуаттайтын борттық отын генераторын ұсынады.

2021 жылы чехиялық MW Motors компаниясы Spartan EV атауымен электрлі УАЗ шығарған. Кейін Ульяновск автозауытының мамандары да электромоторға қызығушылық танытты.