BMW сутекті iX5-тің прототипін көрсетті

BMW X5-тің сутекпен жүретін нұсқасын әзірлеп жатқаны бұрыннан белгілі. Компания бұл туралы ашық айтқан, камуфляжбен қапталған прототип те бірнеше мәрте фототыңшылардың назарына іліккен. Енді автоөндіруші модельді өзі көрсетіп, машина туралы біраз мәлімет берді. Бұл модель 2028 жылы шығады.

1 / 4

• 
• 
• 
• 

1 / 4

Бұл жолы жұртқа белгілі болған басты жаңалық — сутекті сақтау жүйесі. BMW газ баллонды еденге қойыпты: композит материалдан жасалған жеті бак екі металл қабаттың арасында орналасқан. Бұл «сэндвичтің» өлшемі мен пішіні электрлі iX5-тегі жоғары вольтты батареямен бірдей. Соның арқасында зауыт сутекті iX5 пен батареялы нұсқаны бір конвейерге қатар қоя алады.

1 / 9

• 
• 
• 
• 
• 
• 
• 
• 
• 

1 / 9

BMW iX5 Hydrogen-нің бортындағы сутек қоры 7 келі, баллондарды 5 минутта толтыруға мүмкіндік бар және WLTP циклі бойынша жүріс қоры 750 шақырымға жетеді. Ал Америкадағы қатаң EPA әдісімен есептегенде 385 мильді (620 км) еркін еңсереді.

Компания жаңа өнім туралы басқа ақпарат жариялаған жоқ. Бірақ марка iX5-ке Neue Klasse платформасының барлық технологиясын енгізетіні мәлім. Соның ішінде мотор мен шассиді басқаратын Heart of Joy атты электронды басқару жүйесі де бар.

BMW iX5 Hydrogen-нің тұсаукесері сәл кеш өтетінін айттық, ал дәстүрлі мотормен жүретін X5-тің жаңа буынын бренд биыл таныстыруды жоспарлап отыр. Презентация жазда өтуі мүмкін. Наурыздың екінші жартысында желіде кроссовердің суреті тарап кеткен, демек жаңа өнімнің дизайны қандай болатынын көпшілік біліп отыр.