Еуроодақтың монополияға қарсы комитеті Volkswagen AG мен BMW AG-ге ірі көлемде айыппұл салатынын жариялады. Олар 875 миллион еуро айыппұл төлейді. Оның 502 миллионы Volkswagen-ге, ал 373 миллионы BMW-ге салынған.
Автоөндірушілер картель ұйымдастырды деп айыпталып отыр. Еуроодақ өкілдері мәлімдегендей, компаниялар AdBlue сұйықтығы (азот оксид (NOx) шығарындыларын азайту үшін дизельді көліктерге құйылады) бактарының мөлшерін шектеуге келіскен. Шенеуніктердің айтуынша, осылайша технологияның тиімділігі төмендеп, клиенттер экологиялық таза көлік сатып алу мүмкіндігінен айырылды. Бұл әрекет 2006 жылдан бері жалғасып келген.
Daimler AG картельдің үшінші қатысушысы болғанымен, Еурокомиссияға сөз байласу мен сыбайластық туралы барлық деректі ұсынғаны үшін жазадан құтылды.
Автоөндірушілер кінәсін мойындағанымен, Volkswagen заңгерлері монополияға қарсы органның айыппұл туралы шешіміне қарсы шығуды жоспарлап отыр. Олар бұл істе зардап шегуші жоқ, тек келіссөз жүргізгені үшін жаза қолдану орынсыз деп санайды.
Комментариев: 0