BMW компаниясы M5 моделінің атауында CS деген жазуы бар ең қуатты нұсқасының суреттерін жариялап, оған қатысты біраз мәлімет берді. Капот астына бұрынғыдай 4 литрлік V8 турбомоторы орнатылады. Бірақ бұл агрегат 600 емес, 636 ат күші мен 750 Нм айналу моментін береді. 8 сатылы автоматпен жұмыс істейтін седан алғашқы жүздікті 2.9 секундта алады. Максимал жылдамдығы — 306 км/сағ.
Екпін алу жылдамдығының артуына тек ат күші ғана емес, салмағының аздығы да сеп болды. Темір тұлпардың төбесі мен капоты жеңіл, одан бөлек басқа сплиттер мен диффузор орнатылған. Тіпті айналарының қаптамасы да жеңіл материалдан жасалыпты. Артық салмақпен күрескен инженерлер көлік салмағын M5 Competition-мен салыстырғанда 104 келіге кемітті.
Шеберлер машинаның аспасы мен жүріс электроникасын қайта баптап Pirelli P Zero Corsa шиналарын орнатты.
Салонда CS логотиптері, карбон мен алькантараның көптігі, сонымен қатар бірегей орындықтар ерекше көз тартады.
BMW M5 CS тек үш түсте: сұр түстің Brands Hatch және Frozen Brands Hatch деген екі реңкі мен Frozen Deep Green деп аталатын жасыл түсте ұсынылады. АҚШ тұрғындары бұл машина үшін 142 000 доллар жұмсайды, ал Еуропада көлік бағасы 180 400 еуродан басталады. BMW M5 CS бір жыл ғана сатылады.
Комментариев: 0