Hyundai ай сайын төлем сұрау арқылы опция сатпақшы

BMW компаниясының жылытуға болатын орындық үшін ай сайын абоненттік төлем алу идеясының сәтсіз болғанына қарамастан, автоөндірушілер осы саланы қарастыруды жалғастыруда. Мысалы, Mercedes-Benz жылына 1200 долларға электромобильге жылдамдық қосып береді, қытайлық Nio-да автопилот бар, ал Audi екі аймақты климат-бақылау ұсынады. Hyundai де өзін сынап көруге ниетті.

Компания ай сайын қандай қызмет үшін ақы алатыны әлі белгісіз. Hyundai Connected Mobility бөлімшесінің басшысы Маркус Вельц британиялық Autocar-ға берген сұхбатында мұндай қызметтерге көзқарас мүлдем басқаша болады деді. Оның айтуынша Hyundai абоненттік төлем арқылы жаңа көліктерге емес, керісінше, ескі көліктерге жаңа зат қосуды немесе оны жақсартуды көздеп отыр.

Мысал ретінде топ-менеджер күштік құрылымның тиімділігін арттыру немесе жүргізуші ассистенттерін жаңарту мақсатында ескірген электромобильдің бағдарламалық жасақтамасын оңтайландыру мүмкіндігін атап өтті.

Абоненттік төлем бизнесі болашақта автоөндірушілер үшін маңызды табыс көзіне айналуы мүмкін. Stellantis альянсының есебі бойынша 2026 жылдың өзінде оның брендтері жыл сайын қосымша 4.3 миллиард доллар таба алады, ал 2030 жылға қарай бұл көрсеткіш 21.5 миллиардқа өседі.