ҚР ІІМ биыл тоғыз айдағы полиция жұмысының қорытындысын жариялады. Мекеме мәліметінше жыл басынан бері елде 11.9 млн жол ережесін бұзу дерегі тіркелген. Оның ішінде 247 мыңнан аса рөлде отырып телефон пайдаланғандар және 19 мыңнан аса мас болып көлік жүргізгендер бар.
Ереже мен қоғамдық тәртіпті елемей, «дрифт» жасаған 386 факт анықталды. Полиция 59 жүргізушіні қамап, 142 машинаны айыптұраққа қойды, 2.4 мың автомобилист куәлігінен айырылды.
Тоғыз айда жол апатының саны — 5 %, апаттан жарақат алғандар саны — 7 %, қаза тапқандар саны 16 % азайды.
Қыркүйектің аяғында Олжас Бектенов құқық қорғау органдарына рөлде отырып смартфон қолданатын жүргізушілерге жазаны күшейтуді тапсырған. Үкімет басшысы ІІМ мен әкімдіктерге көше мен трассадағы барлық камераны жол үстінде телефонға қарайтын жүргізушіні анықтайтындай етіп қайта баптасын деді, жол қауіпсіздігін қадағалайтын құрылғыларды тексеруді де тапсырды.
Жол үстінде смартфон қолданатын жүргізушіні анықтайтын камералар Алматыда биыл наурызда Әкімшілік кодекске өзгеріс енген соң іске қосылған. Мұндай әрекеті үшін азамат алғаш рет 5 АЕК (2026 жылы 21 625 теңге), бір жыл ішінде қайталаса 10 АЕК (43 250 теңге) айыппұл арқалайды.
Бірақ жүргізушілер айыппұл кейде қате рәсімделетін айтып, шағымданып жүр. Әлеуметтік желіде кей тұрғын жолда кофе ішкені үшін немесе құлағын қасығаны үшін айыпты болғанын жазды.
Комментариев: 0