Биыл Қазақстанда ең көп қандай жол талғамайтын көлік сатылды

Елде жол талғамайтын көлікті бестселлер деп атауға келмейді. Биыл қаңтар мен маусым аралығында ресми сатылатын барлық модельдің жалпы саудасы Hyundai-нің маусымдағы көрсеткішінен аз. Екінші нарықтағы сауда әлдеқайда үлкен. Дегенмен мұндай жаңа автомобильдің өз клиенттері бар. 2024 жылы қандай көлік сұраныста болды?

Биыл Toyota Land Cruiser Prado бірінші жартыжылдықтың сөзсіз көшбасшысы атанды. Алты айда 1071 Prado иесін тапты, оның 292-сі маусымда жаңа J250 нарыққа шыққанда сатылған.

Екінші орынға қытайлық Tank брендінің моделі жайғасты. Алайда бұл арзан «үш жүзінші» емес, ол — 299 ат күшін 500 Нм момент беретін 3 литрлік V6 турбомоторы бар үлкен Tank 500 моделі. Бағалары 23.8-27 млн теңге аралығында. Алты айда бұл жол талғамайтын көліктің 568 данасы саудаланды.

Қазақстандықтар қымбатырақ Lexus LX-тің де біршамасын (447 дана) сатып алған, оның бензиндік LX 600 модификациясы 78.5 млн теңгеден басталады. Келесі орында 408 данасы саудаланған Toyota Land Cruiser 300 тұр.

2024 жылдың бірінші жартыжылдығындағы ең танымал жол талғамайтын көліктің бестігін тағы бір Tank моделі түйіндеді. Бренд 300 индексті модельдің 390 данасын сатқан.

Топ-10-ның қалған бөлігіне Cadillac Escalade (ESV-ді қосқанда 101 дана), Chevrolet Tahoe (96 дана), Range Rover (75 дана), Lexus GX (38 дана) және Land Rover Defender (30 дана) орналасты.

2024 жылғы алты ай қорытындысы бойынша жаңа автомобильдер нарығындағы үздік 10 жол талғамайтын көлік

Пикаптар

Қазақстан нарығындағы пикап саудасына көз жүгіртіп өтейік. Мұнда сөзсіз көшбасшы — Toyota-ның ескі Hilux моделі. Алты айда 624 данасы сатылды. Маусымда «Хайлакс» ең танымал модельдердің үздік ондығына енді. 2.7 литрлік бензинді моторы бар «тойота» 23.4-27.4 млн теңге аралығында тұрады.

Екінші орында қытайлық JAC T6 (182 дана). Бұл пикап 2 литрлік бензинді турбомотормен, механикалық қораппен және толық жетекпен 14-15 млн теңгеге саудаланады.

Үшінші орынды жеңілдік пен арнайы ұсынысты есептемегенде 15-16 млн теңге тұратын GWM Poer KingKong (133 дана) иеленеді. Great Wall Motors компаниясының моделі де 2 литрлік турбомотормен, механикалық қораппен және толық жетек жүйесімен жабдықталады.

Пикаптар рейтингінде нарықта ресми сатылатын Dodge-қа тиесілі RAM брендін де айта кетуге болады. Биыл алты айда 395 ат күшіне ие 5.7 литрлік V8 моторы бар RAM 1500-дің бір данасы сатылды, оны дилерлер кем дегенде 70 млн теңгеге ұсынды.

2024 жылғы алты ай қорытындысы бойынша ең танымал пикаптар