Энергетика министрлігі 15 қыркүйек, яғни дизель құйған машиналарды тіркеу басталған күннен бері арнайы құрылғыны қолданбай-ақ сауда жасап жатқан бекеттер барын анықтады. Ал кейбір көлік иелері кассирге басқа машинаның құжатын көрсеткен.
Ереже бұзған кәсіпкерлерге құзырлы орган айыппұл салады немесе дизельге лимит алу құқығынан айырады, бекетке кірген автомобильді нөмір оқитын видеофиксация жүйелері қадағалайды.
Заңды елемейтін тұрғындармен күрес қашан басталатынын министрлік өкілдері айтпады, бірақ жүйеге кіретін логин мен құпиясөз алған 2307 бекеттің 994-і оны қолданып, 132 994 мәрте дизель сатқанын атап өтті.
Ел тұрғындары дизельді 230-260 теңгеден, ал шетелдіктер 450 теңгеден алатынын айта кеткен жөн. Дизель алу үшін жеңіл машина иесі жеке куәлігін, жүк көлігі, ауыр техника және автобус жүргізушісі техпаспортын қоса көрсетеді.
Бұл құжаттарды ІІМ, ЦДИАӨМ және Мемлекеттік несие бюросының (сақтандыру полистері) деректер базасы көмегімен тексереді. Солярка құйған соң көлік иесі мен сақтандыруда жазылған тұлғаларға 1414 нөмірінен қанша литр дизель алғаны туралы хабарлама келеді.
Комментариев: 0