Бұған дейін министрлік 92-бензин мен дизельдің шекті бағасын 180 күнге белгілеп, қажет болса ұзартатын. Енді баға реттеу мерзімсіз болды. Энергетика министрлігі «Қазақстанның экономикалық мүддесін қорғау, соның ішінде мұнай өнімдерін заңсыз өндіру және сатудың алдын алу» мақсатында осындай шешім қабылдағанын хабарлады. Министрлік сұйытылған газ бағасын да мерзіміне шектеу қоймай реттеуге уәде беріп отыр. Заңға өзгеріс енгізу жобасын мәжілісмендер қарап жатыр.
Қазір жанармай құю бекеттері дизельді Қазақстан азаматына 230–260 теңгеден, шетелдіктерге 450 теңгеден шекті мөлшерде (тәулігіне жеңіл машинаға — 100 литр, жүк көлігіне — 300 литр) сатуға міндетті. Бекеттер Аи-80 маркалы бензиннің (егер бар болса) литрін 89 теңгеден сатады. Ал 92 және 93-бензиннің бағасы Қостанай мен Солтүстік Қазақстан облысында — 187 теңге, Астана, Алматы және Шымкент қаласында, Ақмола, Ақтөбе, Шығыс Қазақстан, Батыс Қазақстан, Алматы, Атырау, Жамбыл, Қарағанды, Қызылорда, Павлодар, Түркістан, Маңғыстау, Абай, Жетісу, Ұлытау облысында — 182 теңге.
Комментариев: 0