Ел арасында Астанинка деп аталатын «РФ шекарасы (Екатеринбург) — Алматы» тас жолының Балқаштан Бурылбайталға дейінгі бөлігін жөндеу жұмысы бірнеше ай бұрын аяқталған. Енді Көлік министрлігіне қарасты Автомобиль жолдары комитеті трассаның бір бөлігі ақылы болады деп жазылған бұйрықтың жобасын жасады.
Құжат бойынша Балқаш қаласынан бастап Тасарал ауылына бұрылатын жерге дейінгі аралықпен көлік тегін қозғала алмайды. Құзырлы орган 91 шақырымдық жолдың бір бағытына мынадай тариф бекітеді:
- жеңіл автомобиль — 300 теңге;
- орын саны 16-дан аспайтын автобус және 2.5 тоннаға дейін жүк көтеретін жүк көлігі — 740 теңге;
- орын саны 32-ден аспайтын автобус және 5.5 тоннаға дейін жүк көтеретін жүк көлігі — 1480 теңге;
- орын саны 36-дан көп автобус және 10 тоннаға дейін жүк көтеретін жүк көлігі — 2250 теңге;
- 10 тоннадан 15 тоннаға дейін жүк көтеретін жүк көлігі — 3020 теңге;
- тіркемесі барын қоса алғанда, 15 тоннадан артық жүк көтеретін жүк көлігі, ершікті тартқыш — 3760 теңге.
Жолға іргелес жатқан елді мекен тұрғындары 7384–36920 теңге төлеп ай сайынғы, 3692–369 200 теңгеге жылдық абонемент ала алады.
Айтпақшы, жақында трассаның дәл осы бөлігінен ақау табылған. Сол кезде жауаптылар бұған жазда ауа температурасының шамадан тыс жоғары болғаны (маусымда +40-тан +45 ℃-қа дейін) және жолда ауыр жүк көліктерінің көп жүргені әсер етті деп мәлімдеп, жуық арада жөндеуге уәде берді.
Комментариев: 0