ҚР Парламент Мәжілісінің үкімет сағаты барысында Қазақстандағы жаңа жолдардың құрылысы жайлы мәселе талқыланды. Мәжіліс депутаттары салынған жолдардың сапасы жайлы да сөз қозғады.
Халық қалаулысы Нұртай Сабильяновтың айтуынша, жуырда ғана салынған жолдардың сапасына теріс әсер ететін бірнеше себеп бар. Олардың қатарында тендер өткізу рәсімінің жария түрде жүргізілмеуі, мердігерлердің жұмысын адал атқармауы, сондай-ақ сапасыз құрылыс материалдарын қолданылуын атауға болады.
Осылардың «арқасында» тек 2017 жылда ғана ел жаһандық бәсекеге қабілеттілік рейтингінің «Жол сапасы» индексі бойынша бірден сегіз сатыға құлдилаған.
Депутаттар тас жолдарды қайта жасау мерзімінің бұзылу жағдайларына да қатысты қынжылыстарын жасырмады. Сабильянов Астана — Павлодар тас жолының сонау 2016 жылы қолданысқа берілуі тиіс болғандығын, бірақ қазіргі таңда 441 шақырымның тек екі жүзі ғана аяқталғанын еске салды. Сол 2016 жылы жасау жоспарланған Халықаралық Батыс Еуропа — Батыс Қытай транзиттік дәлізінің де жекелеген бөліктеріндегі жұмыстар да аяқталмапты.
Мұндай мысалдар жеткілікті, дегенмен, салынғанына бірнеше жыл өтпей-ақ, қайта жөнделетін дайын жолдар да бар. Инвестиция және даму министрі Жеңіс Қасымбек атап өткендей, кепіл мерзімі өтпеген жолдарда анықталған ақаулар жолды салған мердігердің есебінен жөнделеді екен.
«Осы кезең үшін банктік кепіл ұсталады. Ақаулар кепіл мерзімі өтпей тұрып анықталған болса, онда компания толықтай өз қаражатына жөндеу жұмыстарын өткізуге немесе нысанды тапсырыс берушіге жаңадан өткізуге міндетті. Бұл ретте кепіл мерзімі үстеледі не ұзартылады. Бұл компанияларды бастапқы кезден сапалы жұмыс атқаруға ынталандырады» — деді инвестиция және даму министрі.
Комментариев: 0