Қытай шинасы қымбаттауы мүмкін

ЕАЭО аумағында шина өндіретін бірнеше компания Еуразиялық экономикалық комиссияға жүгініп, Одаққа импортталатын резеңке өнімдеріне қатысты тергеу жүргізуді ұсынды. Бұл туралы өз дереккөзіне сілтеме жасай отырып, «КоммерсантЪ» басылымы хабарлады.

Ресейлік «Кордиант», «Кама», Ikon Tyres және Беларусьте жасалатын «Белшина» қазіргі нарық жағдайына наразы. Комиссия зерттеуінің басты нысаны Қытай компанияларының өнімі болмақ. Тергеу қорытындысы бойынша импорт шинаға қосымша баж салығы (дереккөздің мәліметінше 30 %) салынуы не Қытайдан келетін өнімге квота белгіленуі ықтимал.

Қытайдан резеңке импорттаудың күрт өсуі Ресейдің шина өнеркәсібіне зиян келтіріп отыр. Оның үстіне Қытай компанияларымен бәсекеге түсу өте қиын, өйткені олар мемлекет қолдауына сүйенеді.

Мысалы, 2025 жылы Ресейге 25.4 млн жеңіл автомобиль шинасы кірсе, оның шамамен 75 %-ы Қытайдан жетіпті. Қытайдың Бас кеден басқармасының дерегінше былтыр экспортқа шыққан шинаның жалпы құны 510.15 млн долларға жуықтаған Ал 2026 жылдың алғашқы екі айында бұл көрсеткіш 31 % артты.

Ресейде жеңіл автомобиль шинасын өндіру 2025 жылы 20 % қысқарып, 28.1 млн данаға дейін кеміген. Сарапшылар мұны қытай импортының қысымымен байланыстырып отыр. Сондай-ақ қазір Ресейдегі шина зауыттарының орташа жұмыс жүктемесі 51 %-дан аспайды.

Ресей шетелден кіретін шина саудасын бұған дейін де шектеуге тырысқан. Мысалы, 2021 жылы ЕАЭО аумағына Қытайдан келетін жүк көлігі шинасы үшін сұралатын баж салығы 14.79-дан 35.35 %-ға өсті. 2025 жылдың аяғында ЕЭК Оңтүстік-Шығыс Азиядағы компанияларды демпинг жасады деп айыптады. Желтоқсанда Роскачество қытай шиналарында канцерогенді көп циклді иісті көмірсутектің мөлшері жоғары екенін анықтады.