«Атамекен» ҰКП D санатындағы жүргізушілердің ең төменгі жасын 25-тен 22 жасқа дейін және еңбек өтілі бойынша шектеуді 5 жылдан 3 жылға дейін, сондай-ақ D1 кіші санатындағы еңбек өтілін 3 жылдан бір жылға дейін қысқартуды ұсынды. Ұлттық кәсіпкерлер палатасы логистика және тасымалдау департаментінің директоры Мұрат Әмриннің айтуынша, алдағы екі жылда көптеген жүргізуші зейнет жасына толады. Жүргізушінің еңбек өтіліне қатысты талаптар оларды алмастыратын білікті кадр дайындау жұмысын қиындатады.
«Жүргізушілер күніне 5-6 сағат артық жұмыс істейді. Халықаралық тәжірибеде көлік құралын күніне 10 сағаттан артық жүргізуге болмайды, ал бізде олар 15-16 сағат қызмет етеді. D санатындағы жүргізуші куәлігін алу үшін үміткер кемінде 25 жаста болуы керек, оның үстіне шағын автобуста (D1 кіші санаты) 3 жыл, жүк көлігінде (С1 кіші санаты) бір жыл жұмыс өтілі болу талап етіледі. Бұл шарттарды қайта қарау керек», — деді Әмрин.
Бұдан бөлек ол «Жол қозғалысы туралы» және «Автомобиль көлігі туралы» заңға түзету енгізу қажет екенін айтады. Сондай-ақ жүргізуші даярлау бағдарламасын күшейту қажет. ҚР ІІМ бұл мәселені талқылауға дайын екен.
2014 жылы Ішкі істер министрлігінің бастамасымен автобус пен троллейбус жүргізушісі 25 жасқа толу керек және еңбек өтілі болу қажет деген талаптар «Жол қозғалысы туралы» заңға енген. Полицейлер бұл жолаушылардың қауіпсіздігі үшін жасалғанын айтты. Тәжірибесіз жүргізушіге адам өмірін сеніп тапсыруға болмайды.
Айта кетейік, 2019 жылы автобус қатысқан 543 жол апаты болып, 81 адам көз жұмды және 949 адам жараланды. 2020 жылы 327 апат (29 адам қайтыс болып, 455 адам жараланды), 2021 жылы 379 апат (38 адам қайтыс болып 487 адам жараланды) болған. Ал 2022 жылдың 8 айында 198 оқыс оқиға (21 адам қаза болып, 339 кісі жараланды) тіркелді.
Комментариев: 0