Астанада жылдамдықты асырған Porsche 911 жүргізушісі 10 тәулікке қамалды

Ереже бұзған азамат бақылау камерасы арқылы анықталды. Полиция департаменті хабарлағандай, түнде Тұран даңғылында 32 жастағы Porsche 911 жүргізушісі 197 км/сағ жылдамдықпен жүйткіген.

Тексеру барысында жүргізушінің жол ережесін үнемі бұзатыны белгілі болды. Биыл жыл басынан бері ол 30-дан аса мәрте жол ережесін бұзған, оның 14-і — жылдамдықты асыру. Полиция жариялаған бейнежазбадан ол жол ережесін әрітүрлі машинамен бұзғанын көруге болады. Жүргізуші айыппұлдарды төлеген, бірақ тәртіпсіздігін тоқтатпаған. Нәтижесінде автомобилист ұсақ бұзақылығы үшін әкімшілік жауапқа тартылды. Сот оны 10 тәулікке қамау туралы үкім шығарды.

Ережені елемейтін азаматтарды «Бұзақылық» бабы бойынша қамау тәжірибесі Астанада алғаш биыл наурызда басталған. Сәуірден бастап Алматыда да ережені жиі бұзатын жүргізушілер темір торға жабылатын болды.

Биыл ақпанда сенатор, бұрынғы полицей Марат Қожаев жол ережесін қасақана бұзатындарды айыппұлды 50% жеңілдікпен төлеу құқығынан айыруды және бір жылда он реттен көп ереже бұзған жүргізушінің көлік басқару құқығын уақытша тоқтата тұрып, қайта емтихан тапсыруға жіберуді ұсынған. Сондай-ақ депутат жол ережесін жиі бұзатын жүргізушілер үшін міндетті қосымша бағалау жүйесін, соның ішінде машинаны агрессивті жүргізуге бейімдігін тексеру, көлік басқару қауіпсіздігіне әсер ететін мінез-құлық факторлары мен халықаралық тәжірибедегі басқа да бағалау түрлерін енгізу қажет екенін айтқан.