Астанада полиция тәртіпсіз жүргізушілерді қамады

Бұған дейін екінші рет жылдамдық асырғандар тек ірі көлемде айыппұл төлейтін. Мысалы, рұқсат етілген жылдамдықты 60 км/сағ-тан асырған жүргізуші 40 АЕК (2026 жылы 173 000 теңге), бір жыл ішінде тағы камераға түссе 60 АЕК (259 500 теңге) төлейтін. Бәрінің көлігі 100–200 мың доллар тұрады, олар өзара күліп, «менде проездной бар» деп айтатын көрінеді, яғни, 1–2 млн айыппұлмен құтылып, емін-еркін жүре береді, — деді депутат Мұрат Әбенов.

Астана полициясы көшеде жарысатындарға тосқауыл қойған сияқты. Наурыздың аяғында ауданаралық сот BMW 530 және Lexus LX 600 көліктерімен жарысқан жігіт пен қызды 10 тәулікке қамады. Полиция бұған дейін екеуін бірнеше рет жауапқа тартқан.

11 сәуірде сот тағы бір үкім шығарды, күндіз Porsche көлігімен бағдаршамның сары түсіне 133 км/сағ жылдамдықпен өтіп кеткен ер адам 15 тәулігін темір торда өткізеді. Ол да 50-ге жуық айыппұл арқалапты, басым бөлігі — жылдамдық асыру.

Сот 133 км/сағ жылдамдықпен жүйткіген жүргізушінің жылдамдық шегін әдейі асыру, бағдаршамның қызыл түсін елемеу сияқты әрекетін жол қауіпсіздігіне, қоғамға және тәртіпке құрметсіздік деп таныды. Ол ережені біле тұра әдейі және ашық түрде әрекет еткен. Қоғамдық орында басқа жол қозғалысына қатысушыларға қауіп төндірген және қоғамдық тәртіп пен тыныштықты бұзған. Бұл Әкімшілік кодекстің 434-бабы бойынша ұсақ бұзақылыққа жатады.

Осылайша ережеге пысқырмайтын, айыппұл төлеп, ары қарай заңға бағынбай жүре беретін жүргізушілерді жазалаудың жаңа тәсілі пайда болды. Жақында сот ескертпестен жолақ ауыстырып, басқа да нормаларды өрескел бұзатындарды бұзақылық жасады деп жазалай бастайды.

Ең бастысы, билік шалыс басқанның бәрін түрмеге жаба бермеуі керек. Себебі көгалға, мүмкіндігі шектеулі жандарға арналған орынға көлік қою немесе аулада автомобиль қыздыру сияқты кез келген ереже бұзу фактісін құрметсіздік деуге болады.

Сенатор Марат Қожаев жол ережесін жүйелі түрде бұзатындардың жауапкершілігін арттыруды бірнеше рет ұсынды.