Астанада 10 минут көлік қыздыруға рұқсат берілуі мүмкін

Билік Астанада жол қозғалысын ұйымдастыру ережесіне мотор қыздыру нормасын енгізуді ұсынды. Құжат бұған дейін интернетте талқыға түскен, қазір қоғамдық кеңес қарап жатыр. «Астана қаласының жол қозғалысын ұйымдастыру орталығы» ЖШС-нің заң бөлімінің басшысы Шыңғыс Құсайынов Kolesa.kz редакциясына елорда билігі өз бетінше заң шығармайтынын, жол ережесі толық қамтымаған тұстарды нақтылауды көздеп отырғанын айтты. Мысалы, құжаттың 4-тармағы мынадай болмақ:
Астана аумағында көлік құралын тоқтату және тұраққа қою мына ерекшеліктерді ескере отырып, жол ережесіне сәйкес жүзеге асады:

1. Моторы жұмыс істеп тұрған көлікпен (электромобильді есептемегенде) тұрақта 5 минуттан, ауа температурасы —10 °C-тан төмен болған жағдайда 10 минуттан артық тұруға болмайды.
2. Салмағы 3.5 тоннадан асатын жүк көлікті арнайы белгіленбеген жерде тұраққа қоюға тыйым салынады, тек қала инфрақұрылымын күтіп ұстау, тазалау немесе жөндеу жұмыстарын жүргізіп жатқан коммуналдық қызмет көліктеріне рұқсат етіледі.
3. Электросамокатты арнайы аймақтан тыс жерге ретсіз қоюға болмайды.

Астана билігі тек қыста емес, күзде және көктемде ауа температурасы −10 °C-тан төмен түсетін күндері көлікті 10 минутқа дейін қыздыруға рұқсат бермекші. Дегенмен «Жол жүрісі туралы» заңның 4-бабының 34-тармағына сәйкес тұрғын үй аумағында қозғалтқышы жұмыс істеп тұрған көлікпен (электромобильден басқа) тұрақта тұруға тыйым салынады. Сондықтан машинаны ауланың сыртына шыққан соң ғана 10 минут қыздыруға болады. Себебі астана ережесі қолданыстағы заңды өзгерте алмайды.

Бұдан бөлек қалада электросамокатты кез келген жерге тастап кетуге тыйым салынады. Бұл — орынды шешім.

Жергілікті органдар тұрақ орындарын ұйымдастыру және оның жұмысы, сонымен қатар тәркіленген көлікті айыптұраққа жеткізу, сақтау және ақы алу ережесін реттеуді ұсынды. Астанадағы айыптұрақтар ақылы болады. Құжатқа «көлікті тәркілеу және жеткізу туралы уәкілетті органның немесе лауазымды тұлға шығарған актінің күшін жою туралы шешім қабылданса, жүргізуші (иесі) төлемнен босатылады және төленген сома қайтарылады» деген норма қосылады.

Көлік сақтау ақысы автомобиль айыптұраққа орналасқан сәттен бастап 3 сағат өткен соң есептеле бастайды. Эвакуация және сақтау қызметінің ақысын төлеуден 30 күннен астам уақыт бойы жалтарған жағдайда жауапты орган ақшаны сот арқылы өндіріп алады.

Құжатқа аулаға шлагбаум мен қоршау орнатуға қатысты талаптар да жазылады.