Астана — Щучинск трассасында бетон плита көтеріліп кетті

22 маусым күні республикалық маңызы бар Астана — Щучинск тас жолының 216-шақырымында цемент-бетон тақта көтеріліп кеткен. Ақау шыққан жол бөлігін полицейлер жауып, жол жөндеушілер уақытша белгі мен қоршау орнатты. Мамандар оны қалпына келтіріп жатыр.

Дәл осы күні Павлодар облысында жоспарлы мониторинг барысында республикалық маңызы бар Астана —Шідерті — Павлодар — Успенка — РФ шекарасы трассасының 342-шақырымында (Павлодар — Астана бағытында) ұзындығы 500 метр қауіпті жол бөлігі анықталды. Мамандар цемент-бетон тақтаның ішкі қысымы артқанын байқап, деформациялық жікті қалпына келтіріп, арнайы асфальт төседі.

«ҚазАвтоЖол» ҰК хабарлағандай, қазір ел аумағында 36–38 градус ыстық болып, бетон плиталарға түсетін қысым артып келеді.

«Цемент-бетон тақтаға температура әсер етеді: ыстықта бетон плита ұлғайып, суықта жиырылады. Көлік қозғалысы, жоғары температура және плитаның табиғи ішкі қысымы қосылып, кей жол бөлігінен ақау шығады.

Мұндай жағдай көптеген елдегі цемент-бетон жолдарда кездеседі. Халықаралық тәжірибе бойынша мұның алдын алу үшін тұрақты тексеріс жүргізіп, деформациялық жікті бақылау қажет, сондай-ақ плитаның ішкі қысымын төмендетіп, қауіп бар жол бөлігін жедел жөндеу керек», — дейді жол мамандары.

Астана — Щучинск Қазақстанда жаңа технология бойынша салынған алғашқы бетон трасса еді. Жол плитасын ыстықтан қорғау үшін оны арнайы полимерлі асфальтпен жапқан. Бірақ мұндай жабын қыста тайғақ болатыны, ал жазда асфальт бетоннан сырғып, бөлініп қалатыны анықталды.

Биыл елде бірнеше трассада бетон тақта көтерілді. Көбі оңтүстікте.

2021 жылы тексеріс барысында жол жөндеушілер бетон тақтаның жігін күтіп ұстауды «ұмытып кеткендіктен», жол жабыны бүлінетіні белгілі болған.