Астана — Павлодар тас жолының бетон тақтасы тағы бүлінді

Астана — Павлодар ақылы жолының бетон тақтасынан тағы ақтау шықты. 12 маусымда тақта көтеріліп, жолда қауіпті ойық пайда болған. Одан сәл ертерек, көктемнің аяғында Пограничник ауылы маңында бетон тақта шөгіп кетті. Мамандар сол кезде қауіпті бөлікке белгі қойған, сол аумақты жөндеу жұмысы жақында басталды.

Жол жөндеушілер ақауды қалпына келтіру үшін инъекциялы технология пайдаланып жатыр, бұл әдіс жол жабынын қопармай-ақ ретке келтіруге мүмкіндік береді. Мамандар жаңа әдістің арқасында бетон тақта астындағы бос орынды арнайы материалмен толтырып, шөгіп кеткен тақтаны тегістейді.

Жұмыс барысы мынадай. Жол жөндеушілер алдымен цемент-бетон тақта астындағы бос орын мен шөккен аумақты анықтайды. Инъекцияға арналған нүктелерді алдын ала белгілейді. Содан кейін жабын астына материал құю үшін тақтаның таңдалған бөлігінен шағын тесік теседі. Тез қататын қоспаны қысыммен құяды. Материал тақта астындағы бос орынды толтырып, шөккен аумақты жоғары көтеріп, тегістейді. Мамандар процесті нивелир арқылы бақылап тұрады. Соңында тақтадағы тесікті герметикпен бітеп, жол төсемі тегіс болды ма, тексереді.

Жұмыс кезең-кезеңімен жүргіп жатыр. Жол жөндеушілер алдымен Астанаға қарай қозғалыс жолағын, кейін Павлодар бағытын жөндейді. Соның арқасында жол бөлігін толық жабу қажет болмайды.

Астана — Павлодар трассасын жөндеу 2015 жылы басталып, 2019 жылы аяқтаған. Бірақ кейін одан кемшілік табылды. Билік соған қарамастан жолды қолданысқа беріп, 2021 жылы ақылы етті. Ақауы бар бөлік қана тегін болды. Жауапты мекеме осы аумаққа байланысты мердігермен ұзақ соттасты. Трассаның бетон тақтасы бірде көтеріліп, бірде шөгіп жатқанына қарағанда жолдан әлі талай ақау табылатын сияқты.