Арзан тұратын айрықша F40

Тамыздың аяғында Сильверстоунда (Британия) өтетін Iconic аукционында ерекше Ferrari F40 саудаға шығады. Атақты «италиялық» 600 мың фунтқа (770 мың доллар немесе 366 млн теңге) бағаланып отыр, әдетте мұндай F40 кемінде 2 млн доллар тұрады. Бұл машинаның арзан болуының өз себебі бар, ол бөлшектеніп, кейін стандарт емес мотормен жабдықталып, қайта қалпына келген.

1 / 10

• 
• 
• 
• 
• 
• 
• 
• 
• 
• 

1 / 10

Ferrari бұл F40-ты зауыттағы краш-тестке пайдаланған. Кейін шасси қалдығын италиялық бизнесмен Стефано Себастьяни сатып алып, Simpson Motorsport ательесіне берген. Себастьяни аталған компаниямен тығыз байланыста болды, ол Simpson спорт командасының иесі еді. Команда спортшылары «Ле-Мандағы 24 сағат» сияқты Еуропадағы жарыстарға қатысты. Команданың автопаркі негізінен Ferrari өнімдерінен құралған, сол үшін Ferrari басшылары Simpson Motorsport-ты жақсы білді.

Команда механиктері F40 шассиі негізінде бірегей жарыс автомобилін жасауды шешті. Ол үшін зауыттық F40 GTO сияқты жеңіл шанақ дайындады, сондай-ақ қауіпсіздік каркасы, жаңа аспа және басқа дөңгелек дискісімен жабдықтады. Стандарт 2.9 литрлік V8-дің орнын 5.5 литрлік V12 басты. Ferrari 550 Maranello-дан алынған бұл мотор Hewland беріліс қорабымен жұптасады.

1 / 10

• 
• 
• 
• 
• 
• 
• 
• 
• 
• 

1 / 10

Қайта жасалған суперкар бірнеше жыл түрлі жарысқа қатысты. Бірақ ең үздік нәтижесі Британияның GT чемпионатының бір кезеңі саналатын Outlon Park бәйгесінде алған екінші орын болды.

Бұл F40 заңды түрде Simpson Ferrari V12 GTR деп аталады, ол классикалық Ferrari реестріне енбейді. Бірақ аукцион ұйымдастырушылар автомобиль беделді раритет фестивальдеріне қатысуға құқылы әрі коллекционерлерді қызықтыра алады деп санайды.