Астана полицейлері рейд кезінде қаладағы саябақтардың бірінде Hyundai Sonata-ны ұстағанын хабарлады.
«Тексеріс барысында 22 жастағы қыздың арнайы және жедел қызмет көліктеріне ғана рұқсат етілген жарық құрылғысын өз бетінше орнатқаны анықталды. Полиция заңсыз орнатылған жабдықты оқиға орнында алып, автомобильді коммуналдық тұраққа қойды, жүргізушінің атына хаттама толтырды. Мұндай жағдайда жүргізушіге айыппұл салынады», — деді тәртіп сақшылары.
Полиция департаментінің баспасөз қызметі Kolesa.kz редакциясына хабарлағандай, көлік Әкімшілік кодекстің 797-бабына сай ұсталған. Бұл бап көлікті ұстау, жеткізу және пайдалануға тыйым салу тәртібін реттейді.
Ендеше, мәселені тарқатып көрейік.
Әкімшілік кодекстің 797-бабында шынымен автомобильді айыптұраққа қоюға негіз болатын себептер көрсетілген. Бірақ арнайы дыбыстық және жарық сигналын заңсыз орнату Әкімшілік кодекстің 603-бабына сәйкес қаралады. Ал 797-бапта 603-бап тек 654-баппен қатар қолданылады деп жазылған.
Басқаша айтқанда, көк-қызыл стробоскоппен жабдықталған машинаны айыптұраққа қою үшін оның иесі полициямен кездесуден себепсіз жалтаруы керек. Машинаны қолдануға тыйым салуға басқа негіз жоқ. Ал елордалық полицейлер «Сонатаны» бірден эвакуаторға тиеп әкеткен, сонда тәртіп сақшылары Әкімшілік кодексті дұрыс білмей ме деген сұрақ туады.
Оның үстіне Әкімшілік кодекстің 797-бабында көлік айыптұрақта «ұстау себебі жойылғанға дейін» тұрады деген жолдар бар. Астана полициясы заңсыз жабдықты «оқиға орнында алып тастадық» деп мәлімдеді. Демек көлікті алып кетуге еш негіз болмаған.
Материал дайындалып жатқанда бізге қоңырау шалып, өзін әкімшілік практика басқармасының аға инспекторымын деп таныстырған адам Hyundai Әкімшілік кодекстің 785-бабына сәйкес айыптұраққа қойылғанын айтты. Оның сөзінше ереже бұзған азаматтар әдетте қашып кетіп, кейін сотқа келмей қояды, сондықтан полицейлер осындай шешім қабылдаған. Алайда қоңырау шалған кісі «Соната» иесіне қатысты хаттаманы оқымағанын, ол қандай бап бойынша жауапқа тартылғанын көрмегенін мойындады. Ол тек жағдайды түсіндірмек болып хабарласыпты.
Осы бір күмәнді түсіндірмеге сүйенсек те, 603-баптың 2-бөлігі (арнайы жарық және дыбыс сигналын рұқсатсыз орнату) үшін жеке тұлғаға 25 АЕК (2026 жылы 108 125 теңге) айыппұл салынады. Айыппұл туралы қаулыны судья емес, полиция шығарады. Олар бірден планшетте хаттама толтырып, ереже бұзған азаматтың дерегімен бірге Әкімшілік іс жүргізудің бірыңғай реестріне жібереді. Ендеше, көлікті неге айыптұраққа жіберді? Айыппұл салынды, барлық дерек прокурор базасына түсті, тағы не қажет? Айыппұлды мәжбүрлеп өндіріп алмақ па? Бірақ мұндай мақсатта шетелдік көлікті ғана ұстауға болады (оның өзінде барлық бап бойынша емес). Қазақстандық машинаны бұл Әкімшілік кодекс бойынша ұстауға тыйым салынған.
Полицияның заңсыз әрекетіне байланысты қыз шағым түсіріп, көлігін қайтарып ала алады. Тіпті департаментті сотқа беруге құқығы бар, бірақ бұл мүлде бөлек әңгіме.
Комментариев: 0