Арменияда жеңілдікті кезеңде тіркелген машиналарды меншіктен шығаруға тыйым хақында 2014 жылдың 29 мамырындағы «Армения Республикасының Еуразиялық экономикалық одаққа қосылуы туралы келісімшарттың 5-қосымшасында жазылған. Құжаттың 35-тармағында көрсетілгендей, Армения аумағында тіркелген машиналарды ЕЭО мүшесі болып табылатын өзге елдердің аумағына тек Армения Республикасының тұрақты азаматтары ғана кедендік алым-салықтарды төлеместен уақытша кіргізе алады. Ал мұндай машиналарды ЕЭО елдерінің аумағына кіргізу, пайдалану, сонымен қатар жеке меншіктен шығару, басқаның қолданысына беру — тек «өзге елдегі» кедендік мағлұмдау мен салықтар төленгеннен кейін ғана мүмкін болады. (Айтпақшы, осындай талаптар қырғызстандық көліктерге де қатысты).
Келісімшартқа қол қойған кезде Арменияның ресми өкілдері аталған талаппен келісті. Алайда «тыйым салынған көліктер» оңды-солды сатылып кетті. Ал армениялық полицейлер олардың «бөтен елге» сатылуына жол берген. Бұл әдейі істелді ме, әлде білместіктен бе? Қазақстандықтардың арқасында одақтас елдің азаматтары қанша қаражат тапқанын есепке алсақ, армениялық тәртіп сақшыларының «аңғалдығы» көңілге күдік ұялатады.
Армения вице-премьері Мгер Григорян парламенттегі үкімет сағатында аталған көліктердің ЕЭО елдеріне экспортталуын Армения шектеуге тиіс болғандығын айтты. Шендінің сөзінше, елге ЕЭО шеңберінде берілген жеңілдікті кезең әлеуметтік мәселелерді шешуге бағытталған, алайда көбіне коммерциялық мақсатта қолданылып, «серіктес елдер үшін күтпеген жағдай» болды.
«Болар іс болды, енді жағдайды ретке келтірудің жолдары мен мүмкіндіктерін іздеуге тиіспіз. Қазақстанға қатысты мәселе өршіп тұр. Қазіргі уақытта Арменияда осы елден жағдайды реттеу мақсатында келген делегация жүр. Жуық арада сұрақтың шешімі табылады деп ойлаймын. Бұл айтарлықтай күрделі мәселе болғандықтан, мен қазір толыққанды ақпарат бере алмаймын», — деді армениялық вице-премьер.
Армениядан көлік алған қазақстандықтардың жайы не болмақ? Заң тұрғысынан олар Армения Республикасына барып көлікті сата алады не болмаса сот арқылы сатып алу/сату келісімшартының күшін жоюға тырысуына болады. Бұл ұзаққа созылатын, көп ақша талап ететін, әрі күрмеуі көп процесс. Бірақ осындай жолмен жұмсалған қаражаттың біраз бөлігін қайтарып алуға болады. Десе де қос ел билігінің тығырықтан шығатын басқа жол табуы да ғажап емес.
Естеріңізге сала кетейік, біздің азаматтар әкелген шетелдік нөмірдегі армениялық, ресейлік және қырғызстандық автокөліктер заң бойынша барлық алым-салықтарды төлеу арқылы елде тіркелуі не Қазақстаннан шығарылуы тиіс. Мұндай машиналардың ЕЭО тауары болып табылмайтынын жуырда ҚР СИМ өкілдері мәлімдеді. Десе де қазақстандық полицейлер әзірше заң бұзғандардың елден қуылмайтынын, тек түсіндіру жұмыстары жүргізілетінін хабарлады.
Қазір Қазақстанда Еуро-4 стандартына сай, күндізгі жарық шамдарымен және басқа да бірқатар құрылғылармен жабдықталған көліктерді ғана бастапқы есепке қоюға болады. Бастапқы тіркеу үшін төленетін алым мөлшері кіргізілетін машинаның жасына, ал утилизациялық алым мөлшері — қозғалтқыш көлеміне байланысты.
Комментариев: 0