Облыс әкімдігі Қандыағаш пен Алға қаласында жаңа камера іске қосылғанын хабарлады. Кешен Алғадағы Абай көшесі мен Вокзальный тұйығы қиылысында және А.Жангелдин көшесінде, ал Қандыағашта Тәуелсіздік даңғылы, «Фосфорит» гараж кооперативінің маңы және А.Байтұрсынов пен Т.Байқұнов көшесі түйіскен жерге орнатылған.
Полиция департаменті хабарлағандай, SUNQAR камерасы патрульдік полиция қызметкерлерінің басқаруымен емес, өз бетінше жұмыс істейді, жүйе жасанды интеллект көмегімен жол ережесін бұзғандарды анықтап, деректі Әкімшілік іс жүргізудің бірыңғай реестеріне жолдайды.
Полиция департаменті өкілдері жол ережесіне сай «Фотовидеофиксация» белгісін орнату міндетті талап емес екенін айтты.
Бұған дейін «сұңқар» камерасы Алматы облысындағы Құлжа тас жолында қызмет ете бастаған. Техникалық сипаттамасына сәйкес жаңа камера 25 түрлі ереже бұзу әрекетін тіркей алады. Соның ішінде мыналар бар:
- бағдаршамның тыйым салынған түсіне өту;
- стоп-сызықтан асып кету;
- жылдамдықты асыру;
- қарсы бетке шығу;
- жол белгісі немесе жол таңбасы талабын сақтамау;
- жүргізушінің қауіпсіздік белдігін тақпауы және қауіпсіздік белдігін тақпаған жолаушыны тасымалдау;
- көлік жүргізіп келе жатып Hands Free құрылғысынсыз телефон пайдалану;
- сыртқы жарық шамдарын жақпай көлік жүргізу және т.б.
Комментариев: 0