АҚШ билігі Tesla-ның есік тұтқасы қауіпті деп есептейді

Электрлі құлпы бар жылжымалы есік тұтқасы бұған дейін де дау туғызған, сондықтан Қытай билігі оларға мүлде тыйым салмақшы. Бұған тек Қытай шенеуніктері емес, Америка билігі де назар аударды. Олар Tesla көліктеріндегі жүйені зерттеп жатыр, оған ата-аналар наразы екен.

LA Times хабарлағандай, АҚШ жол қауіпсіздігі басқармасы (NHTSA) Tesla-ның электрондық есік тұтқасын тексере бастады. 12 вольттық аккумулятордағы кернеу қалыпты деңгейден төмендегенде тұтқа істемей қалады. Мұндай жағдайда есікті төтенше механикалық тұтқа арқылы іштен ашуға болады, бірақ сырттан ашу мүмкін емес.

Жазда аптап ыстықта жабық көлік ішінде бала қалып қойса, қауіп арта түседі. Бүгінге дейін ақау зерттеу басқармасына (ODI) Tesla иелерінен 16 шағым түскен, төртеуінде ата-аналар немесе құтқарушылар баланы шығару үшін есік әйнегін сындыруға мәжбүр болды деп жазылған.

Есепте көбінесе 2021 жылғы Model Y көлігі кездеседі, бірақ жалпы тексеріс 2020–2022 жылдары жасалған Model Y мен Model 3 модельдерін қамтиды. ODI мұндай есік тұтқасы қауіп төндіреді десе, NHTSA брендті миллиондаған көлікті серивске шақыруға міндеттеуі мүмкін.