Қытай Өнеркәсіп министрлігі автоөнеркәсіп саласында жаңа стандарт дайындап жатыр, ол бойынша машинаға суырмалы есік тұтқасын орнатуға тыйым салынады. Жергілікті БАҚ хабарлағандай, жаңа ереже 2027 жылы күшіне енуі мүмкін.
Дизайнерлер «жасырын» есік тұтқасы электрокардың технологиялық имиджі мен аэродинамикасын жақсартады деп санайды. Бірақ шын мәнінде оның ауа кедергісін азайту мүмкіндігі төмен, соған сай энергия тұтыну мөлшеріне еш әсер етпейді. Керісінше, оның сервожетегін орнату автомобиль салмағын арттырады. Мұндай тұтқа әдеттегіден үш есе қымбат тұрады. Оның үстіне суықта қатып қалуы мүмкін.
Мұндай механизм Қытайда балалардың жарақат алу қаупін екі есе арттырды. Сондай-ақ машина бүйірінен соққы тисе, көбінде істен шығады.
Қытай Өнеркәсіп министрлігі жартылай суырмалы тұтқаға рұқсат беруге дайын, бірақ автоөндірушіні машинаға қосымша механикалық ашу жүйесін орнатуға міндеттейді.
Билік әлі нақты шешім қабылдаған жоқ, бірақ бұл ұсыныс қолдау тапса, жаңа ереже 2027 жылы шілдеде күшіне енеді. Сол сәттен бастап жаңа автомобильге суырмалы есік тұтқасын орнатуға тыйым салынады. Сарапшылар бұл шешім Қытайда ғана емес, күллі әлемдегі автомобиль дизайнын өзгертеді деп санайды. Қытай автоөнеркәсіп өкілдері бұл шешімді сынға алды. Мысалы, Great Wall басшысы Вэй Цзяньцзюнь жасырын есік тұтқасы күрделі, қымбат, тиімсіз екенін әрі жиі бұзылатынын айтты.
Комментариев: 0