АҚШ билігі әйгілі спортшының қымбат мотоциклдерін тәркіледі

2002 жылғы Олимпиадада Канада намысын қорғаған сноубордшы Райан Уэддинг «Эль Хефе» деген лақап аты бар есірткі бароны болып шықты. Ол өз елінде емес, Мексикадағы бандасымен Колумбиядан АҚШ-қа кокаин жеткізген.

Канада азаматы Федералдық тергеу бюросы тізімінде ең қауіпті 10 қылмыскердің бірі ретінде тұр. Оның мүлкі құқық қорғау органдарының қолына түсті. Мысалы, былтыр қарашада Бюро агенттері Лос-Анджелесте Уэддингтің 13 млн доллар тұратын 2002 жылғы Mercedes-Benz CLK-GTR родстерін тәркіледі. Ол омологация үшін жасалған алты болидтің бірі. Желтоқсанда кезек 40 млн долларға бағаланған мотоцикл коллекциясына келді.

Motorsport журналының дерегінше суреттерден Валентино Росси, Хорхе Лоренцо, Андреа Довизиозо, Лорис Капиросси және Андреа Янноне тізгіндеген MotoGP-дің бірегей прототиптерін көруге болады. Сонымен қатар 2012 жылы Moto2 титулын жеңген Марк Маркестің екі дөңгелекті болиді және Россидің Aprilia мотоциклі (125 текше см) бар.

Мотоциклдердің тағдыры белгісіз. Аукционға шығуы ықтимал. Полиция Уэддингті әлі ұстамады.