Ақпанның басында Алматыда кептеліс болады

1-2 ақпанда оңтүстік астанада Еуразия мемлекетаралық кеңесінің отырысы және Digital Almaty форумы өтеді. Оған Қазақстан, Армения, Беларусь, Қырғызстан, Ресей премьер-министрлері мен ЕЭК коллегиясының төрағалары қатысады.

«Іс-шараның ауқымы мен келетін қонақ санын ескере отырып, Алматы қаласының полиция департаменті 1 және 2 ақпанда ішінара қозғалыс шектелетінін хабарлайды.

• 1 ақпанда Әл-Фараби, Шығыс айналма жол, Құлжа тас жолы, Саин, Шаляпин, Майлин және Бұқтырма көшелерінде қозғалыс шектеледі.
• 2 ақпанда Әл-Фараби, Сейфуллин даңғылдары мен Саин, Жароков, Шаляпин көшелерімен жүру қиындайды.

Бұл шектеулер қоғамдық көлік қозғалысын қамтымайтынын атап өткен жөн. Қала тұрғындарынан уақытша шараға түсіністікпен қарап, кептеліске тап болмау үшін бағытын алдын ала жоспарлауды сұраймыз», — деді полицейлер.

Шетелден қонақ келмесе де, күнделікті қарбалас сәттерде мегаполис көшелерінде ұзын-сонар кептеліс болып, көлікпен өту азапқа айналатынын ескерсек, екі күн қозғалыс тіпті тоқтап қалуы мүмкін.