Қалдыбаев 99 — «Адам өлтіру», 188 — «Ұрлық», 287 — «Суық қаруды заңсыз сақтау, алып жүру, иемдену, өткізу» баптары бойынша айыпты деп танылып, оған 19 жылға бас бостандығынан айыру жазасы кесілді.
КТК телеарнасы хабарлағандай, 22 жастағы сотталушы өз кінәсін мойындапты. Бірақ қылмысты жасаған кезде ақыл-есінің дұрыс болмағанын айтқан ол, сот үкіміне шағым түсірмекші екен.
Естеріңізге сала кетейік, сержант погонын таққан айыпталушы, Теміртау қаласының жол-патрульдік полициясында қызмет еткен. Осы жылдың көктемінде ол отау құрмақ болыпты. Той жасауға ақшасы жетпегендіктен, полиция қызметкері жолға шығуды ұйғарған. Алайда, басқа әріптестері сияқты ала таяқпен емес, тапаншамен шыққан.
Айыпталушы көлікті иемдену мақсатында, құны 7-8 миллион теңге шамасындағы 55-үлгідегі Toyota Camry автокөлігін сату туралы хабарландыруды тауып, иесіне хабарласып (алдын ала телефонға өзге SIM-карта орнатқан), кездесуге келіскен. Ал кешке Қарағандыдағы ескі әуежай маңындағы автокөлік базарында көлікті қарау барысында оның иесін табельдік қарумен атып өлтірген. Екі баланың әкесінің өлі денесін «тойотамен» Бұқар Жырау ауданына қарасты Ростовка ауылының шетіне апарып, суға батырып жіберген. Көліктегі қан іздерін жуып, түк болмағандай сол көлікпен Теміртаудағы жұмысына барыпты. Тапаншаны қару қоймасына өткізбес бұрын әріптесінен артық оқ-дәрі тауып беруін өтінеді, мұны ол көшеде қаңғып жүрген итті атқанымен түсіндіреді. Әлгі әріптесі оған қуана-қуана көмектескен.
30 сәуір күні басына оқ тиген автокөлік иесінің мәйіті су жағасынан табылған. Алдын ала жоспарланған отбасымның жанында болдым деген дәйегіне, әрі тіркелмеген SIM-картаны пайдалану сынды басқа да айла-амалдарына қарамастан, қандықол қылмыскер 2 мамыр күні анықталып, сол күні құрықталған.
Қалдыбаевтың қорғаушысы айыпталушының психологиялық жағдайына байланысты үкімді қайта қарауды сұраған. Алайда, алдында жасалған сараптама қандай да бір маңызды ауытқудың жоқтығын көрсеткен екен. Сол себепті, сот пен алқабилер бұл өтінішті қабылдамай, сот үкімін өзгертуден бас тартты.
Комментариев: 0