Мегаполистің криминалдық полиция басқармасы хабарлағандай, биыл көліктен зат ұрлау дерегі көбіне Алатау (14), Алмалы (9), Түрксіб және Әуезов аудандарында (6) тіркелді. Қылмыскерлер көлікке әйнекті сындыру арқылы (19 факт), ашық қалғанын пайдаланып (17), кілтпен ашу немесе құлыпты бұзу арқылы (11) кіреді. Жыл басынан бері полицейлер көлік ұрлаумен және бөлшектеумен айналысатын тоғыз топты ұстады. Дегенмен қалада автокөлік салонына көз салатындар саны 5.4 есеге азайған.
Екі жыл бұрын Алматы қаласының әлеуметтік-экономикалық дамуы жөніндегі кеңесте ҚР президенті Қасым-Жомарт Тоқаев оңтүстік астана полициясының жұмысын сынға алған еді. «Алматы қылмыс деңгейі бойынша елімізде бірінші орында тұр. Бұл жерде ұсақ құқық бұзушылықтар — ұрлық пен бұзақылықтың үлесі басым. Олардың көптігі сонша, қала тұрғындары бұл жағдайды қылмыс жайлап алғандай қабылдайды. Автокөлік айналарын ұрлаудың неге алып келуі мүмкін екеніне даңқты спортшымыз — Денис Теннен айырылғанда көз жеткіздік. Осыдан сұрақ туындайды: бейнекамералар мен цифрландырудың оң әсері қайда? Қазірше біз олардың еш пайдасын көрген жоқпыз», — деді Қасым-Жомарт Тоқаев.
Комментариев: 0