ИИДМ, Экология министрлігі және мегаполис әкімдігіне жолданған сауалда Алматы ауасын негізінен автокөліктер ластап жатқаны жазылған. Сыртқа тарайтын зиян газдың 65 %-ы солардан шығады екен.
«Қазақстанда мамандар өткізетін экологиялық мониторинг пен қазынадағы ақшаға салынатын экобекеттер, жүргізушілердің мойнына ілініп жатқан салық мәселені шешпейтінін мойындаған жөн. Енді жаңа бастама көтеріп, жүйелі жұмыс жасау керек деп санаймыз. Көрші Өзбекстан, Ресей не Қытайдағы секілді Алматы маңындағы аудан орталықтарына қатынайтын пойыз жүргізуді ұсынамыз», — деп мәлімдеді депутаттар.
Олардың сөзінше Ташкент пен Самарқан арасына сағатына 250 км, Бейжің мен Шанхай арасында 350 шақырым, Мәскеу мен Петербор арасына 240 км жылдамдықта пойыз қатынайды. Ал Алматыдан Қонаевқа баратын электр пойызының жылдамдығы (30 км/сағ) күлкі шақырады. Небәрі 65 км жол жүру үшін 2 сағат уақыт кетеді. Машинамен 30-40 минутта жетесіз.
«Азаматтар сондай электр пойызына отыра ма?» — деген сұрақ қойды депутаттар.
Айтпақшы, Алматы облысындағы G4 City қаласын дамыту туралы жоспарда Қонаевқа баратын жүрдек трамвай іске қосу ұсынылған. Бірақ бұл жуық арада іске асатын шаруа емес.
Бұрынғы әкім Бақытжан Сағынтаев Қаскелең мен Талғарға электр пойызын жібермек болған. Бірақ қазіргі билік LRT салуды жоспарлап отыр.
Комментариев: 0