Мәжілісмен Альберт Рау вице-премьер Роман Склярдың атына жолдаған депутаттық сауалында үкімет жанар-жағармай нарығындағы жағдайды тұрақтандыру үшін шұғыл шаралар қабылдауы керек екенін айтты. Халық қалаулысының айтуынша, биыл жыл басынан бері АИ-92 бензинінің бағасы Алматыда литріне 150 теңгеден 168 теңгеге, Нұр-Сұлтанда 170, Ақтауда 172, ал мұнайлы өлке Атырауда 200 теңгеге дейін өскен. Бұған дейін энергетика министрлігі қымбатшылықты импортқа тәуелділікпен немесе мұнай өңдеу зауытындағы жоспарлы жөндеумен түсіндірсе, бұл жолы Атырау мұнай өңдеу зауытындағы технологиялық қондырғылардың апаттық жағдайда тоқтап қалуымен байланыстырып отыр.
«Өндірістік мәселелердің «объективті себептерін» таба алатындарыңызға күмәніміз жоқ. Бірақ бұдан қарапайым жүргізушілер зардап шекпеуі керек. Сонымен қатар бензин бағасының өсуі тарифтердің, тауарлар мен қызметтердің соңғы құнына ықпал етеді. Түптеп келгенде зиян шегетін қарапайым тұтынушылар», — деді депутат.
Оның айтуынша, энергетика министрлігінің жанармай бағасын нарық белгілейді деген ұстанымы орынсыз. Бұл оларда бензин бағасының өсуін тежейтін тиісті стратегия мен шараның жоқ екенін көрсетеді.
Депутат үкіметке шұғыл түрде жанар-жағармай нарығындағы жағдайды тұрақтандыру үшін шара қабылдауды ұсынды. Сонымен қатар бензин бағасын реттеудің тиімді тетіктерін әзірлеп, енгізу қажет екенін айтты.
Комментариев: 0