Алматыдағы Саин көшесін ұзарту жоспары биыл орындалмауы мүмкін

Оңтүстік астана әкімінің орынбасары Алмасхан Сматлаев Саин көшесін Рысқұловтан Мөңке биге дейін ұзарту жұмыстары қай кезеңде екенін айтып берді. Объектінің 70 %-ы дайын, 3.2 км жолдың 1.6 шақырымында ғана асфальт бар. Құрылыс биыл желтоқсанның аяғы мен келер жылы қаңтардың басында аяқталады. Жолшылар Саин көшесін ұзартуды 2019 жылы бастап, 2023 жылы аяқтаймыз деген.

— Біз жауапты мердігердің белгіленген мерзімге үлгеретініне және құрылысты аяқтайтынына барынша сенеміз. Апта сайын объектіге барып, бақылап отырмыз. Жұмыс қарқынын арттырамыз, — деді әкімнің орынбасары.

Алмасхан Сматлаев Абай даңғылын Строительная көшесінен қала шекарасына дейін (600 метр) созу аяқталғанын, бұл бөлікте абаттандыру жұмыстары жүріп жатқанын атап өтті.

Мамандар Рысқұлов даңғылын Оңғарсынова көшесінен қала шекарасына дейін ұзарту жұмысын келер жылы қарашада бітірмекші, ал Жұбановтың Момышұлы көшесінен қала шекарасына дейінгі бөлігі 2027 жылдың қарашасында ашылуға тиіс. Жер телімін сатып алудағы мәселеге байланысты Төле биді созу жоспары кейінге қалды.