Алматыдағы ақылы тұрақтар 20:00-ге дейін жұмыс істейді

Биыл маусымда қала мәслихаты eGov.kz порталындағы «Ашық НҚА» бөліміне көлік қоятын орындарға қатысты шешімдер жобасын жариялаған.

Әкімдік ережелердің толық мәтінін жария етпеді, бірақ жаңа нормалар қатарында 500 метрден аспайтын жерде тұратын кісілерге тұрақты тегін пайдалануға рұқсат беру, көлікті арнайы тұраққа жеткізу ережелерін қайта қарау, электросамокат қоятын орындарды ұйымдастыру және т.б. бар.

Бүгін, 30 шілдеде мәслихат 48-сессиясында " Алматы қаласындағы ҚР Жол жүрісі қағидаларымен реттелмеген бөлікте жол қозғалысын ұйымдастыру қағидаларын" бекітті. Құжат әлі шыққан жоқ, бірақ Жол қозғалысын ұйымдастыру және жолаушылар көлігі басқармасының басшысы Ержан Диханбаев жаңа ережелерді түсіндірді.

Нормалар күшіне енген кезде мегаполистегі жол жиегінде тұрған ақылы тұрақтар бұрынғыдай 19:00 емес, 20:00-ден кейін тегін болады.

Көп қабатты үйде тұратындар 500 метрлік жерде тұрған коммуналдық тұрақты тегін пайдаланады, бірақ билік ол үшін арнайы орын бөлмейді. Ардагерлер, мүгедектігі бар кісілер, көп балалы аналар, электромобиль және шұғыл қызмет көлігін тізгіндеген тұрғындарға бұрынғыдай жеңілдік бар.

Электросамокат пен басқа жеке көлік құралдары да назардан тыс қалмады. Шенділер талап күшіне енген соң халық мұндай техниканы көрінген жерге тастап кетпейді, бұл жаяу жүргіншілердің қауіпсіздігін арттырады деді.

Тағы бір блок арнайы тұраққа көлік жеткізу және оны сақтау мәселесін реттейді. Енді эвакуация қызметі тәулік бойы еңбек етіп, әрекетін фото және видео арқылы тіркеуге және тексеріс актісін жасауға міндетті. Көлік иесі машинасын эвакуация күні 18:00-ге дейін алып кетсе, сақтау ақысын төлемейді.