Алматыдағы Әл-Фараби даңғылын 14 шілдеде қайтадан жабады

Әл-Фарабидің оңтүстігіндегі Торайғыров көшесінен Есентай арқылы өтетін көпірге дейін жөндеу жұмыстары бітті. Алматы қалалық мобильділік басқармасы бұл аймақта көлік қозғалысы бірқалыпты екенін хабарлады. Енді жолшылар Есентай арқылы өтетін көпірден бастап Батыс Желтоқсанға дейінгі аймақты жөндейді.

14 шілде 23:00-ден бастап 15 шілде таңғы 8-ге дейін даңғылдың оңтүстігінде қозғалыс толық шектеліп, полимерлі асфальтбетон төсеу жұмыстары басталады.

Бүгін 8:00-ден 15 шілде 21:00-ге дейін Есентай өзенінің солтүстігінен Батыс Желтоқсан көшесіне дейін реверсивті қозғалысы ұйымдастырылады. Оңтүстік астана жүргізушілері батыс және шығыс бағытта қанша жолақпен жүретінін патрульдік полиция реттейді.

Полицейлер жол көлік апатын алдын алу мақсатында 14 шілде 23:00 мен 16 шілде 7:00 аралығында шығыс бағытта (Есентай арқылы өтетін көпірден бастап) көлік қозғалысын толық шектейді.

Жабық көшелерді солтүстікте Жароков көшесі арқылы айналып өтуге болады. Жүргізушілер Сырғабеков, Үшкемпіров, Қаппаров көшелері мен батысқа Esentai Mall арқылы өтетін айналма жолды пайдалана алады.