Абай даңғылын Момышұлы көшесінен қала шекарасына 4.7 шақырымға ұзарту жоспарланған. Kolesa.kz тілшісіне әкімдіктің баспасөз қызметі хабарлағандай, қазір даңғылдың 1.2 шақырымы қолданысқа берілді. Құрылысшылар алдағы уақытта 3 км жол салып, Әшімов көшесімен қиылыстағы жолайрықты жөндеуі қажет.
Істің созылуы жеке үйлерді бұзу мәселесімен байланысты. Жұмысшылар жер телімдері сатып алынса қазір-ақ жалғастыруға дайын екендерін айтты.
Ал жер қатынастары басқармасы Абай даңғылы Әуезов және Наурызбай аудандарына қарасты 198 жер телімі арқылы өтетінін хабарлады.
«Алматы әкімдігі 194 нысанға қатысты «Мемлекет қажеттігі үшін жер телімдерін не жылжымайтын мүлікті мәжбүрлі түрде иеліктен шығаруды бастау» туралы қаулы қабылдады. Оның ішінде 31 жер телімі келісімшарт бойынша, 111 объект сот шешімімен сатып алынды, тағы бес нысан бойынша мәжбүрлі түрде иеліктен шығару қаулысының жобасы әзірленіп жатыр. Қазір 56 жер телімін сатып алуымыз керек», — деді шенділер.
Сатып алуға қанша қаражат керектігін басқарма мамандары айтпады, бірақ бұған республика бюджетінен ақша бөлу жөнінде өтініш беріпті, ол осы күзде комиссия талқысына салынады.
Комментариев: 0