ҚР Энергетика министрлігі хабарлағандай, биыл 28 маусымда Алматыдағы дизельдің жалпы қоры 11.8 мың тонна болды, бұл қалаға 19 күнге жетеді. Маусым айының басынан бері оңтүстік астанаға 21.4 мың тонна дизель жеткізілді. Ал маусымның басынан Алматы облысына 21.8 мың тонна дизель жіберілген. 28 маусымда облыстағы дизель қоры 9.8 мың тонна болды (12 күнге жетеді).
Алайда Алматыда және облыста тұтынушылар сұйық отын тапшылығына шағымданып жатыр. Жанармай құятын бекеттердің көбінде, тіпті үлкен желілерде де дизельді тек түнде, оның өзінде шектеулі мөлшерде алуға мүмкіндік бар. Ал күндіз дизельді кейбір шағын компаниялардан тек талонмен немесе өте қымбат бағада (литрі 230 теңгеге дейін) сатып алуға болады. Бәрінен де жолда жанармайы таусылғандарға қиын болды. Оның үстіне қаладан ұзаған сайын жағдай күрделене түседі.
Министрлік қызметкерлерінің айтуынша, қазір елде бензин мен дизель бар. Барлық мұнай өңдеу зауыттары қалыпты режимде жұмыс істеп, мұнай өнімдерін ішкі нарыққа тұрақты жөнелтіп жатыр. Ал бағаны бақылауға министрліктің құқығы жоқ.
Кейбір мәліметтерге сенсек, дизель зауыттардан қажет мөлшерде жеткізіледі. Бірақ бизнесмендер оны бекетке жібермей, 1 шілдені күтіп отыр. Өйткені бірінен бастап дизельге салынатын акциз (салық) өседі (маусымдық жағдай, күзге дейін), соған сай баға да жоғарылайды. Сөйтіп кәсіпкерлер бұрын арзан бағада алған жанармайды қымбатқа сатып, пайдаға кенелмек.
Бұл мәселеге бәсекелестікті қорғау және дамыту агенттігінің мамандары назар аударғаны жөн шығар. Монополистердің жұмысын бақылап, тауар жеткізушілермен сөз байласуды тоқтатуға аталған мекеме жауапты.
Комментариев: 0