15 қыркүйекте Құлжа тас жолының бойында Audi мен Porsche орталықтарының жанында Volkswagen автосалоны ресми түрде ашылды. Соған ұқсас орталық елордада клиенттерін күтуде.
Volkswagen Centre Almaty кәдімгідей ірі орталық, аумағы 3.5 мың шаршы метрден асады, оның мыңы — сервис аймағы. Жөндеу жүргізетін цехта 13 негізгі бекет, тегін көлік жуатын орын, бөлшектер қоймасы мен арнайы құрал сақтайтын жеке бөлме бар.
Тұсаукесерде компания өкілдері жоспарын жариялады. 2021 жылдың аяғына дейін Павлодарда, ал 2022 жылдың басында Ақтөбеде салон ашылады. Одан кейін Ақтау клиенттеріне қызмет көрсететін орталық пайда болады. Марканың модельдер топтамасы жаңа жылға дейін Volkswagen Jetta және Teramont кроссоверімен толығады.
Салтанатты шараның ресми бөлімінде Volkswagen Taos таныстырылды. Техникалық жағынан автокөлік жаңа болғанымен, ол көктемде сатылымға шыққан. Қазір 18 данасы иесін тапты.
Шілдеде Volkswagen Taos-тың бағасы 10.6-13.8 млн теңге аралығында болған, күз келісімен көлік қымбаттады, енді сатушылар ол үшін 11-14.2 миллион сұрап отыр. 110 ат күшін беретін 1.6 MPI атмосфералы моторы мен 5 сатылы механикалық қорап орнатылған алдыңғы жетекті нұсқасы қолжетімді саналады, ал ең қымбаты Exclusive деп аталады. Толық жетекті машина 1.4 литрлік турбомотормен және 7 сатылы DSG (DQ381) роботымен жабдықталады.
***
Жаңа автосалонның пайда болуы аңызға айналған «ВАЗ» техникалық орталығының тағы бір тарих парағын ашқан секілді.
Осы уақытқа дейін Volkswagen өнімдері сатылған мекеме Кеңес дәуірінде Министрлер кеңесінің тапсырмасымен салынып, 1973 жылдың аяғында қызмет ете бастады. Бұл орын КСРО күйрегенге дейін «жигули» иелері үшін маңызды орындардың бірі болды.
Мұнда «Лада» сатылымы 90 жылдардың аяғында тоқтады, ал ВАЗ көліктеріне 1998 жыл аяқталғанша, нақтырақ айтсақ, Volkswagen — Mercur Auto дилері жұмысын бастағанға дейін қызмет көрсетілді.
Комментариев: 0