BMW автокөлігі Әл-Фараби мен Меңдіқұлов қиылысында тәртіп сақшыларының көзіне түскен. Алматы қалалық Полиция департаментінің баспасөз қызметі хабарлағандай, көлікті тоқтатып, тексеру барысында оның нөмірінің жалған екендігі анықталды.
«Шамасы, автокөлікті тізгіндеген азамат Н. ескі техникалық құжаттағы серия байқалмай қалады деп ойласа керек, алайда олай болуы мүмкін емес. Бұрын автокөлікте „ВВВ“ сериялы нөмір болған, ал автокөліктің өзі есептен шығарылған. Ал қазіргі сәтте жүргізуші „ЕЕЕ“ сериялы жалған нөмірді орнатып алыпты. Мұндай әрекет үшін заңда екі әкімшілік айыппұл қарастырылған, соған сай аталған жол бөлігінде қызмет атқарған инспекторлар хаттама толтырды», — деп Алматы қалалық ПД ӘПБ мамандандырылған батальонының командирі Серікжан Әбжанов хабарлады.
Тәртіп сақшыларының айтуынша, жүргізушінің атына ҚР ӘҚБК-нің 590-бабының 3-бөлігі («Көлiк құралына көрiнеу жалған немесе қолдан жасалған мемлекеттiк тiркеу нөмiрi белгiлерiн (белгiсiн) орнату») және 590-баптың 4-бөлігі («Көрiнеу жалған немесе қолдан жасалған мемлекеттiк тiркеу нөмiрi белгiлерi (белгiсi) бар көлiк құралын басқару») баптары бойынша хаттама толтырылыпты. Енді оған 50 мың теңгеден аса айыппұл төлеу қажет болады, тіпті жүргізуші куәлігінен қағылуы да ғажап емес. Іске қатысты материалдар оңтүстік астананың мамандандырылған ауданаралық әкімшілік сотына жіберілді.
Комментариев: 0