Алматыда жаңа каршеринг іске қосылды

Бейсенбі, 18 қазан күні 18:00-де каршерингтің жаһандық операторы Қазақстандағы жұмысын бастады. Компания Anytime деп аталады. Ол көрші Ресейде көптеген жылдар бойы табысты қызмет атқарып келеді, ал құрушылар болса, танымалдығы алғашқысынан кем түспейтін «Делимобиль» және «Делисамокат» сынды қызмет түрлеріне басшылық етеді.

Anytime компаниясының Қазақстанға қатысты жоспары айтарлықтай ауқымды. Компанияның деректеріне сенсек, бастапқы кезеңде әлден 10 мың адам тіркелсе, олар үшін жүз автокөлік қолжетімді болады екен. Бұл жерде сөз Ресейде өндірілген автоматтық трансмиссиялы судай жаңа Volkswagen Polo седандары жайлы болып отыр. Осы жылдың желтоқсанында көліктер саны тағы жүзге артса, 2019 жылы 500 дананы құрайтын көрінеді. Ал 2021 жылға қарай компания 1.5 мың темір тұлпардан тұратын паркке иелік етуді қалайды.

Әзірше каршеринг өз қызметін тек Алматыда бастайды. 2019 жылы ол Астанада іске қосылады, ал келер жылдың соңына таман Volkswagen Polo-ны Шымкентте де жалға алу мүмкін болмақ.

Anytime қызметі қарапайым. Пайдаланушыға тиісті қосымшаны жүктеп, банк картасын бекіте отырып, жүргізуші куәлігімен және жеке куәлікпен селфи жасау арқылы тіркелу қажет болады. Мәлімет расталғаннан кейін автокөлікті ала беруге болады.

Көліктер қала бойынша шашыраңқы орналасқан. Көлікке дейін жетіп, оны іске қосу үшін тек 20 минут уақыт беріледі. Әйтпесе күттіргеніңіз үшін қосымша ақы төлеуге тура келеді, ал оның құны минутына 13 теңгені құрайды. Ал онымен жүру бағасы минутына 19 теңгеден тәулігіне 13 мың теңгеге дейінгі әртүрлі төрт тариф бойынша есептеледі.

Көлікті қаланың кез келген жеріне, бірақ белгіленген шектің ішінде қалдыруға болады. Ең бастысы, тұрақ орны ЖҚЕ-ін бұзбауы тиіс, ал көлік қолжетімді болуы қажет. Оған қоса, пайдаланушыларға Aparking қызметі үшін ақы төлеудің қажеті жоқ — тұрақ тегін болады.