Оқиға бүгін Әл-Фараби даңғылындағы Orion тұрғын үй кешенінің тұрағында болды. Tengrinews.kz хабарлағандай, 33 қабатты үйдің шатырынан құлаған мұз үш Toyota-ны бүлдірген.
«Сағат 11 шамасында көлігімді бір-екі минутқа қалдырып кеткенмін, сол аралықта маған қоңырау шалып, «Toyota Camry-дің иесі сыртқа шығыңыз» — деді. Шыққан соң машинаның жанында қалыңдығы 7 см-ге жуық үлкен мұзды көрдім. Білесіздер ме, менің жолым болды, себебі сол мұз басыма түсіп, мерт болуым мүмкін еді», — деді көлік иесі.
Келген зақымдарға көз салсақ, көліктердің әрқайсысын қалпына келтіруге кемі 200 мың теңге кететін сияқты. Онда да, егер артқы әйнек пен жүксалғыш қақпағын өз ақшасына сатып алса. Жөндеу жұмыстарына бөлек қаржы жұмсауға тура келеді.
Бірнеше жыл бұрын kolesa.kz машинаңызға ағаш құласа шығынды қалай өндіріп алуға болатыны туралы жазған болатын. Бұл жағдайда да дәл сол әрекеттерді жасау қажет: оқиға орнын тастап кетпейміз, полиция шақыртамыз, келген зақымның барлығын тіркейміз, шағымнан бас тартпаймыз. Ең бастысы, саспау керек және ПИК қызметкерлерімен не басқарушы компаниямен соңына дейін күрескен жөн!
Комментариев: 0