Алматыдағы сары түсті қосарлы бүтін сызық нені білдіреді?

Әлеуметтік желіде Назарбаев даңғылының Абайдан Әл-Фарабиге дейінгі аралығында жаңарған таңбаның суреті және видеолары тарады. Жолдағы қосарлы бүтін сызық сары түске боялған. Жүргізушілер мұның мәнін түсінгісі келіп, таңбаны басқа түске бояуға бола ма деген сұрақтар қойып жатыр. Анықтайық.

Жол ережесі мен мемлекеттік стандарттарда сары сызық (1.3) бұрыннан бар. Мысалы, сары сызық 2021 жылы Астанада Мәңгілік ел даңғылының Ұлы дала көшесінен Қабанбай батыр даңғылына дейінгі аралығында, Жеңіс және Сарыарқа даңғылдарының кейбір бөлігінде пайда болды. Кейін елді мекен арасындағы жолдарда көзге түсті.

Полиция екі жағдайда да бұны халықаралық тәжірибеге негізделген эксперимент деп атады. Яғни, Алматыға сәл кешігіп келді деуге болады.

Сары түстің мәні неде?

Сары сызық ауа райы нашар болғанда, қар жауғанда және одан кейін де жақсы көрінеді. Мысалы, АҚШ-та негізгі жолдағы сызықтар түгелдей сары түске боялады. Бұл қарсы бағытқа шығып кету сияқты апаттардың санын азайтып, жолдағы қауіпсіздікті арттырады.

Жол ережесі не дейді?

Жол ережесінде таңба мен олардың түрлері 2-қосымшаның 1-тарауында аталады. Төрт немесе одан көп жолағы бар жолдың қарама-қарсы бағытындағы көлік ағынын бөлетін қосарлы сызықтың нақты түсі көрсетілмеген. Дегенмен қосымшаның басында былай деп жазылған:

Көлденең жолақ ақ немесе сары түске боялады. Ал 1.4, 1.10 және 1.17 сызықтары тек сары болады.

Яғни, тоқтауға (1.4), тұруға (1.10) тыйым салынған жерлер және қоғамдық көлік пен такси тоқтайтын орындар (1.17) ғана сары түсті болады. Бірақ бұл басқа таңбаны сары түске бояуға тыйым салынады дегенді білдірмейді.

Бұл уақытша таңба емес.

Сары қосарлы бүтін сызық мемлекеттік стандартта бар ма?

Жол ережесінде жолақты қолдану және оның түрі мен техникалық сипатын реттейтін екі мемлекеттік стандарт бар. Біріншісі — ҚР СТ 1412-2017 «Жол қозғалысын ұйымдастырудың техникалық құралдары. Қолдану қағидасы». Бұл құжатта 1.3 таңбаның түсі нақты жазылмаған, бірақ Г.1 кестесінде тек ақ сызық көрсетілген.

ҚР СТ 1124-2019 «Жол қозғалысын ұйымдастырудың техникалық құралдары Жол таңбасы. Жіктемесі. Техникалық шарттар» құжатында (А қосымшасының А.1 кестесі) сызық (1.3) ақ және сары түсті бола алады делінген. Яғни, мамандар оны қолдана алады.

ҚР СТ 1412-2017 стандартының 4.8-тармағына сәйкес Қазақстанда ұлттық немесе мемлекетаралық стандартта көрсетілмеген жол қозғалысын реттеу құралдарын эксперимент ретінде қолдануға болады. Ол үшін жүргізушілер мен жаяу жүргіншілерге алдын ала ескертіп, оның мақсатын түсіндіру жеткілікті.