Бүгін Бостандық ауданының тұрғындары Ерболат Досаевқа BRT жолағынан солға бұрылу мүмкін емес екенін айтып шағымданды. Бұл мәселе аудан ғана емес, бүкіл қала тұрғындарын мазалап жүрген сияқты.
Әкімнің айтуынша Тимирязев, Сүлейменов және Мұстафин арқылы өтетін автобус жолағын қала 2022 жылы 31 мамырда балансқа алған. Енді оны жақсарту жұмысы басталады. Шаһар басшысы әсіресе, Тимирязев көшесінде арагідік жағдай қиындайтынын мойындады. Сондықтан қоғамдық көлік жүретін жолды оң жақ шетке ауыстыру жоспарланып отыр.
Досаев жолдың дәл ортасында тұрған аялдамалар мәселесін қалай шешетінін айтпады. BRT жолағынан солға бұрылуға рұсат беріле ме, жоқ па, ол да белгісіз. Қисынға салсақ, солай болуға тиіс. Бастысы, бұл жолы үміт бар. Өйткені алдыңғы әкім Бақытжан Сағынтаев мегаполисті өзінен бұрын басқарған Бауыржан Байбектің идеясына көңілі толмаған тұрғындардың шағымын мүлде тыңдамап еді.
Оңтүстік астанадағы BRT әу баста стандартты ескерусіз салынған. Ол бойынша бір бағытта жолағы үштен аз көшеге арнайы жолақ сызуға болмайды. Шенділер мен урбанистер стандартқа өзгеріс енгізуге тырысқанмен, ІІМ мен ИИДМ тар жолға жолақ салу қауіпсіз емес екенін айтып, ұсынысты қолдамады. Сол себепті таңба шетке ығысса да, BRT бәрібір заңсыз болады.
Айта кетерлігі, жобаны жақтаушылар стандартқа тар көшеге автобус жолағын сызуға рұқсат беретін өзгеріс енгізуге ниеттеніп отыр.
Қоғамдық көлік жүретін жолақ қаіуіпсіздікті сәл де болса арттырып, автобус қозғалысын жылдамдатады, бірақ бірнеше талап сақталуға тиіс.
2025 жылға қарай Райымбек даңғылына да BRT түседі. Қазір бар жолақ Желтоқсан бойымен Төле биге, Төле биден Шығыс айналма жолға, одан Құлжа тас жолына, әрі қарай жаңа автовокзалға дейін созылады. Одан бөлек жергілікті билік Талғар, «Медеу» және Үлкен Алматы көліне баратын жүрдек автобустарды жолға шығару мүмкіндігін қарастырып жатыр.
Комментариев: 0