2021 жылы күзде Алматы прокурорлары Тәтібеков және Халиуллин көшесінен автобус жолағын алып тастады. Өйткені ҚР СТ 1412-2017 стандартына сәйкес «бір бағытта үш не одан көп жолағы бар көшеге ғана арнайы таңба сызуға болады». Ал жоғарыдағы көшелер тар, жолақ саны аз.
Алматы қалалық мобильділік басқармасы урбанистермен бірге Қазақстан стандарттау және метрология институтына өтініш жазып, аталған стандарттың 6.2.3-тармағында көзделген шектеуге өзгеріс енгізуді ұсынды.
Kolesa.kz-ке институт қызметкерлері хабарлағандай, мемлекеттік стандартқа өзгеріс енгізу мәселесі бірнеше ай бойы талқыланып, Ішкі істер министрлігі мен Индустрия және инфрақұрылымдық даму министрлігі бұл ұсынысты қабылдамады. Себебі тар жолға арнайы жолақ салынса, жол қозғалысы қауіпсіздігіне кері әсерін тигізеді. Сонымен қатар велосипедшілер мен самокат мінгендер қатысатын апаттың көбеюіне ықпал етеді.
Тимирязев көшесіндегі BRT стандартқа сай ма?
Алматыдағы BRT жолағы Тимирязев, Мұстафин, Рысқұлбеков және Сүлейменов секілді тар көшелерге салынған. Алда Желтоқсан көшесінің бойымен Төле биге дейін, Төле бидің бойымен Шығыс айналма жолға дейін осындай желіні іске қоспақ. Желтоқсан мен Шығыс айналма кең, бірақ Төле би көшесінің әр бағыты екі жолақты ғана. Мұнда BRT түссе, қаланың жоғарғы бөлігінде күн сайын болатын кептеліс мегаполистің басқа аудандарында да күшейетіні анық.
Kolesa.kz Алматыдағы BRT-ны дамыған елдердегі автобус жолағымен салыстырып, жобаның кемшілігін бірнеше мәрте көрсетіп берді.
Қалалық мобильділік басқармасы BRT құрылысы стандартты бұзбағанын айтады, өйткені оны бірнеше ведомство мақұлдап, тәжірибе ретінде салған. Сондай-ақ олар BRT бар көшелерде қоғамдық көлік жылдам қатынап, жолаушылар тасымалы артқанын айтады. Мұнымен келісуге болады. Бірақ олар күн сайын автобус жолағының жанында жеңіл көліктердің ұзын сонар кептелісте тұратынына назар аудармайды.
Әкімдік өкілдері BRT жолағы бар көшелерде кептелісте тұрған көп машинадан шыққан улы газ бен шу сол маңдағы тұрғындарға зиян екенін де естен шығарған секілді. Оның үстіне мұндай көшелерде аялдауға да, көлікті тұраққа қоюға да мүмкіндік жоқ.
Комментариев: 0