Алматыда бір түнде 50-ден аса жол апаты болды

13 қараша кешке қарай оңтүстік астанада қар жауа бастады. Қалада он балдық кептеліс пайда болды. Көлік қозғалысы қиындап, оқыс оқиғалардың саны артты. Мегаполистің полиция департаменті хабарлағандай, 13 қараша сағат 20:00-ден 14 қараша 06:00-ге дейін Алматыда 52 жол апаты тіркеліп, оның 18-інде адам зардап шекті. Салыстыру үшін айтсақ, бір жыл бұрын сағат 20:00-ден 6:00-ге дейін қалада кісі зардап шеккен жеті ғана апат тіркелген.

Қар жауар алдында Алматы әкімдігі мегаполисте 160 құм себетін машина кезекшілікте болатынын айтқан. Көктайғақпен күреске 490 арнайы техника мен 1.2 мыңға жуық жұмысшы атсалысады. Ал аудан әкімдіктері көше тазалығын тәулік бойы тексеріп отырады. Бірақ шенділер бұл уәдесін орындай алмаған сияқты. Бүгін таңда машиналар (арасында мопед те бар) әлі соғылып жатыр. Мысалы, Саин көшесінде сағат 8:00 шамасында үш жол апаты болды. Абырой болғанда, ешкім зардап шеккен жоқ.

Редакция мен Алматы жүргізушілері таңертең қар жаумағанымен, кей жолда асфальт қатып, жұқа мұз қабаты пайда болғанын байқады.

Kolesa.kz редакциясы заң бойынша көлік дөңгелегін 1 желтоқсанға дейін ауыстыру керек екенін еске салған, бірақ дөңгелекті ертерек ауыстырған жөн, өйткені табиғаттың өз заңы бар. Ал коммуналдық мекеме қызметкерлері тапсырманы дер кезінде орындай бермейді.