Жеңілдікті автонесие бағдарламасы басталып, жаңа көлікке сұраныс артқандықтан, қосымша опция қосып сату мәселесі өзекті бола түсті. Кей автосалон машинаны әлі ресми бағасынан әлдеқайда қымбат сатып жатыр.
Алматы прокуратурасы сатушылардың мұндай әрекеті заңсыз екенін хабарлады. Прокурорлар ақпаннан бастап автосалондардың қызмет көрсетуі мен қосымша жабдық сату заңдылығын тексеріп, наурызда анықталған заң бұзушылықтарды жою туралы ұсыныс енгізіпті.
Мекеме екі ай кешігіп барып, салондар қандай заң талабын бұзатынын жариялады:
- ҚР Конституциясының 26-бабына сәйкес монополиялық қызмет заңмен реттеледі және шектеледі. Орынсыз бәсекелестікке тыйым салынады.
- «Тұтынушы құқығын қорғау туралы» ҚР заңының 8-1-бабына сай cатушы (орындаушы, дайындаушы) тұтынушымен жасалған шартқа тұтынушының құқығын бұзатын және (немесе) оларға қысым жасайтын талаптарды енгізбеуі керек.
- Заңның 28-бабына сәйкес сатушы (дайындаушы, орындаушы) тиісті сападағы тауарды (жұмысты, көрсетілетін қызметті) тұтынушының өзіне қолайлы уақытта еркін таңдауына мүмкіндік жасауға міндетті.
- Тұтынушыны тауарды (жұмысты, қызметті) қажетсіз мөлшерде сатып алуға мәжбүрлеуге тыйым салынады.
- Белгілі бір тауарды (жұмысты, көрсетілетін қызметті) алғысы келген тұтынушаға оны алу үшін өзге бір тауарды (жұмысты, көрсетілетін қызметі) сатып алуды міндеттеуге тыйым салынады.
Шарт жасасқан кезде сатушы тұтынушыға ақылы тауар сатып алуды міндеттесе, бұл тұтынушыныңың құқығын бұзатын әрекет саналады.
«Қазір уәкілетті орган жаңа көлік сататын дилерлік орталықтардың тауар нарығындағы бәсекелестік жағдайына талдау жасауды аяқтады», — деп жазды қалалық прокуратура.
15 сәуірде Kia автосалондары жеңілдікті автонесие бағдарламасына қатысатын көліктерге қосымша жабдық қосып сатпайтынын мәлімдеді. Ал Hyundai ақпанда машинаға опция қосып сатуға тыйым салған.
Қосымша опция сату шынымен тоқтады ма? Пікір қалдырсаңыздар болады.
Комментариев: 0