Жуырда қала әкімдігі мен полицейлер Шығыс айналма жолы мен Әл-Фарабиде жылдамдықты төмендету шарасының күтілгендей нәтиже бермегенін айтып, аталған көшелерге «80» белгілерінің қайта қойылатынын мәлімдеді. Саин көшесіндегі жылдамдық сол шектелген күйі қалады, алайда бұл ереже бекітілгеннен кейін де Саин әлі де апат жиі болатын көшелер қатарында.
Тәртіп сақшыларының айтуынша, Алматы жолдарында өлім-жітімнің көптігіне дұрыс жарықтандырылмауынан, бағдаршамдардың, жаяу жүргіншілерге арналған жолақтардың, жылдамдық бәсеңдеткіштердің жеткіліксіздігінен, сонымен қатар жолдағы тәртіпті қадағалайтын бейнекамералардың жоқтығы себеп болады.
Жолдағы адам өлімін азайту үшін оңтүстік астананың әкімдігі полиция департаментімен бірге келесі шараларды қолға алатынын мәлімдеді:
— жыл соңғына дейін бұрын жарықтандырылмаған 208 көшеге шамдар орнату. Жаяу жүргіншілерге арналған 70 жол мен апат көп болатын жол бөліктерін жарықтандыру;
— қосымша 77 орынға «Сергек» кешенін орнату;
— жол апатының жиілігі жоғары 72 жол бөлігін қайта жасау. Бұрылу радиусын азайтып, тротуарлар мен пандустар салу;
— қыркүйекте 50 қауіпсіздік аралы салынады, статистика бойынша, олар ЖКО-ның санын 46 %-ға азайтады екен;
— реттелмейтін жол қиылыстарына қосымша жеті бағдаршам орнату;
— көлік құралдарының жылдамдығын мәжбүрлі түрде бәсеңдететін жасанды жол бұдырларын көбейту.
— мектеп жанына және адам көп жиналатын жерлерге реттелмейтін жаяу жүргіншілер өтпесін салу.
Одан бөлек шенділер шағын бизнес өкілдерінің тілегін құлақ асып, Қонаев және Байтұрсынов көшелерінің бір жағынан велосипедшілерге арналған жолақты алып тастамақ. Бірақ қай бөлігінен алынатынын ашып айтпады.
Өткенде ҚР БП-ның құқықтық статистика және арнайы есепке алу комитеті Шығыс айналма жолы, Әл-Фараби және Саин көшелеріндегі жылдамдық шектелгеннен кейін көлік астына түскен жаяу жүргіншілердің саны бір жарым есеге азайды деп есеп берген болатын.
Комментариев: 0